Mizoramah Covid-19 vei hmuh a tlahniam

March 8, Thawhlehni khan Mizoramah Covid-19 vei mi 483 hmuh chhuah a ni a, hmuh zat leh positivity rate a tlahniam. Nimin khan hripui vei dam tawh mi 779 chhuahtir an ni a, Covid-19 vei thi an awm lo.

Thawhlehnia Covid-19 vei hmuh chhuahte chu mipa 203 leh hmeichhia 280 an ni a; RT-PCR hmanga hmuh pathum, TrueNAT hmanga hmuh 48, RAT hmanga hmuh 426 leh FIA hmanga hmuh paruk niin, positivity rate 16.17% a ni.

Nimin khan hripui vei dam tawh mi 779 chhuahtir an ni a, district tina chhuak zat chu - Aizawlah mi 185, Serchhipah 171, Mamitah 82, Lungleiah 78, Saitualah 70, Khawzawlah 68, Champhaiah 50, Hnahthialah 49, Kolasib-ah 17 leh Siahaah mi pakua an ni.

IDSP record angin, Mizoramah Covid-19 vei 2,19,156 hmuh chhuah a ni tawh a, mipa 1,02,315 leh hmeichhia 1,16,841 an ni a, mipa aiin hmeichhia 14,526-in an tam zawk. Nimin tlai dar 5 thleng khan mi 2,15,252 (98.22%) chhuahtir an ni tawh a, mi 665 (0.30%) thi tawhin, enkawl mek mi 3,239 (1.48%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,19,156 chu mi 1,000 zelah hripui vei mi 199 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah March 8, 2022 thlenga swab sample endik tawh 18,57,123 aṭanga positivity rate chu 11.80% a ni a; RT-PCR hmanga endik zat percentage chu 20.02 a ni a, RAT hmanga endik zat chu 74.32% a tling.