Vice President-in Mizoram Assembly House-a member-te chêt dan a fak

Nimina Assembly session-ah Vice President Venkaiah Naidu chuan thu a sawi a; Mizoram Legislative Assembly House-a member-te chêt ṭhin dan fakawm a tih thu a sawi.

M Venkaiah Naidu chuan, India vice president a nih bakah Rajya Sabha chairman a nih thu sawiin, "Legislature hi dan siamtu an ni. State hrang hrangah kalin, an legislature kalphung ka zâwt chiang ṭhin. Rajya Sabha leh state dang tam takah chuan awmze nei loin buaina a awm fo. Mizoram legislature kalphung hi ṭha ka ti a, fakawm ka ti tak zet," a ti.

India chu democracy ram a nih angin Parliament leh Assembly House-ah inhnialna leh sawihonate chu awm tur a nih thu sawiin Vice President chuan, "Inhnialna awmze nei a awm tur a ni a, chumi hmang chuan harsatna awmte chinfel tur a ni. Constructive debate hi a ṭangkai hle," a ti a, inhnialna piah lama buaina thleng ṭhin chu ṭha lo a tih thu a sawi.

Vice President chuan, Mizoram chu inthlan kalphungah pawh entawn tlak a nih thu sawiin, "Inthlanna thianghlim leh felfai tak in nei ṭhin tih ka hria. Chumi atan chuan civil society, kohhran leh tlawmngai pawlte'n tha an thawh hlâwk hle," a ti.

M Venkaiah Naidu chuan, mahni pianpui ṭawng dah pawimawh a ṭul thu sawiin, "Ṭawng dang buaipui hmain kan pianpui ṭawng hi dah pawimawh hmasain, kan chawi sang phawt tur a ni," a ti a; ṭawng hrang hrang dangte thiam pawh thil pawi a nih loh thu a sawi.

Sustainable Development Goals (SDGs) India Index 2021-ah Mizoram chu kum 2019-20-ah 21-na a nih thu sawiin Venkaiah Naidu chuan, "Kum 2020-21 ah 12-naah a invawrh chho thei hi a lawmawm. Hmasawnna hna thawh leh hmalaknate reng reng hi tuna mite tan chauh ni lo, kan tu leh fate chanvo tur tichhe loa kalpui tur a ni. Mi harsa berte chawi kanna tur hawi zawnga kalpui a ṭul," a ti.

M Venkaiah Naidu chuan, hmarchhak state-te hmasawnna sorkar laipuiin a ngaihtuah thu sawiin, "Hmarchhak state-ah hian an legislative assembly-ah hmeichhe member tam zawk an awm theih a pawimawh," a ti a; tun dinhmunah Parliament-ah pawh 11% chauh hmeichhia an awm thu a sawi.

Vice President-in thu a sawi zawhah House leader Zoramthanga chuan lawmthu a sawi a, "State buai berte zinga mi ni ṭhin kha tunah chuan state rálmuang ber kan ni ta. State dang tan pawh he remna leh muanna hi entawn tlak a nih ngei ka beisei," a ti.

Chief Minister chuan, Vice President-in a hun chêp tak karah India rama hmun kilkhâwr ber zinga mi Mizoram a tlawh thei chu lawmawm an tih thu sawiin, "Boruak nuam tak hnuaiah Assembly session neih ṭhin a ni a, buaina kan nei ngai lo," a ti a, Mizoram Legislative Assembly kalphung chu state dangte tan entawn tlak a nih ngei a rin thu a sawi a ni.