College-ah zirtirtu hna ruak 68 a awm

Higher & Technical Educa­tion (HTE) minister Dr R Lalthangliana chuan MNF member Dr ZR Thiam­sanga zawhna chhangin, Mizoram chhunga college hrang hrangah zirtirtu hna ruak 68 a awm thu House a hrilh.

HTE Minister chuan, Mizorama college hrang hranga zirtirtu indaih lohna phuhru turin a theih ang angin hmalak a nih thu a sawi a, "Hna ruakte hi a ngheta la turin ruahmanna a awm. Amaherawhchu, tun dinhmunah chuan sum harsatna avangin tihpuitlin theih a la ni rih lo," a ti.

National Education Policy, 2020 chu policy a nih angin a vaia hman nghal leh tihhlawhtlin nghal theih a nih loh thu tarlangin R Lalthangliana chuan, "A tahtawla hman zel chi a ni. Kan affiliating university MZU hian chak taka hma lain, session thar aṭanga hman ṭan tumin curriculum-te pawh her remin an siam chho zel," a ti a, Mizoram sorkar hnuaia college-te pawhin an hman chhoh ve zel tur thu a sawi.

Dr R Lalthangliana chuan, sorkarin State Level Task Force Commi­ttee on NEP, 2020 (Higher Education) a din thu sawiin, "Workshop leh meeting-te neiin, NEP tihhlawhtlinna atana hmalak­na tur duan mek zel a ni. India ram pumpui regional leh zonal meeting atan State Concept Paper on Implementation of NEP, 2020 pawh buatsaiha thehluh a ni," a ti.