Vice President-in pâwl hruaitute a kâwm

Vice President M Venkaiah Naidu chuan nimin khan Raj Bhavan-ah Mizoram University hotu te, NGO Coordination Committee, Mizoram Kohhran Hruaitute Committee, Ex-Mizo National Army (Ex-MNA) leh Zo Reunification Organisation (ZORO) hruaitute leh, Ukraine buaina chhuahsana Mizorama haw hmeichhe pakhat a kâwm.

M Venkaiah Naidu chuan, Mizoramah kohhran leh tlawmngai pawl hrang hrangte’n ṭha taka sorkar an thawhpui ṭhin tih a hriat thu a sawi a; ṭha taka thawhpui chhunzawm zel tur te, remna leh muanna a awm theih nan theihtawp chhuah zel tur leh India ram inpumkhatna atan pawl ṭangkai ni zel turin a chah.

Kohhran leh tlawmngai pawl hruaitute chuan ziakin Mizoram mamawhte an thlen a; Mizoramah Myanmar raltlan 30,000 chuang an luh tawh thu sawiin, raltlante chunga ngilneihna lantira ṭanpuina pe tur te, raltlante awmna khua leh district-te chu sum leh paia chhawmdawl an ngaih thute an hrilh.

Indian Constitution 8th Schedule-a Mizo ṭawng telh leh Mizoram tana IAS cadre hran neih a ṭul thu te, Tripura-a awm Bru-te Mizoram electoral roll aṭanga paih an duh thu te, Mizoram leh Assam ramri buaiah inremna tluantling a awm theih nan sorkar laipuiin hma a lak a ṭul thu an tarlang a; border trade a taka kalpui a nih theih nan leh Assam Rifles-te Zokhawsanga sawn chhuah thuai an nih theih nan hma la turin an ngen bawk.

MZU hotute chuan MZU hmasawnna leh mamawhte an tarlang a, Lungleiah MZU Southern Campus a taka kalpui a nih thuai theihna tur leh hmalak nana thil tihfel hmasak ngaite chinfel thuai a nih theih nan hma laksak turin an ngen. Mizoramah College of Physical Education, multi speciality hospital leh, Champhai leh Mamitah star college din tura rawtna an thehlut nghal.

Inkawmnaah hian MKHC aiawhin president Rev. Dr Vanlalnghaka Ralte, MZU pro-vice chancellor Prof JK Patnaik, NGO Coordination Committee chairman R Lalngheta, Central YMA General Secretary, MZP President, MHIP President, MUP President leh MSU General Secretary-te bakah, Ex-MNA leh ZORO hruaitute an tel a ni.