Kum 2022-23 Mizoram budget-ah mipui tan beisei tur a awm lo - ZPM
ZPM party chuan thuchhuah siamin, kum 2022-23 Mizoram budget-ah hmasawnna tur a lang lo niin an tarlang a, "Kum 2022-23 budget-ah hian mipui tan beisei tur a awm lo hi a lungchhiatthlak kan ti hle a ni," an ti.
ZPM chuan, Mizoram sorkarin kum 2022-23 sum hman dan tur a pharhah hmasawnna ruhrel dinna tur hawi zawnga ruahmannaah mipui vantlang tana hmasawnna leh nawmsakna hawi zawnga sum hman dan turin hniam lam a pan zel tih an sawi a; ei leh bâra hmasawnna tur lam (economic sector)-a hmalakna tur pawh MNF sorkar tirhah budget pumpui aṭangin 31% a nih laiin, budget tharah chuan 24% a nih thu an tarlang.
MNF hruai sorkarin hmasawnna tura hmalak a tumna ber SEDP chu a takah chuan sum hman danah a lang chiang tih sawiin ZPM chuan, "Hniam lam a pan zel avangin kum 2022-23 budget-ah hian mipui tan beisei tur a awm lo a, a lungchhiatthlak kan ti hle a ni," an ti.
ZPM chuan, mipui aiawha thlante'n House record-a awm tlâk lo thu an chhâk chhuah fo thu sawiin, chu chu rorelna fel lo lan chhuahnaa an ngaih thu an tarlang a, "Session programme mipuiin kan thlir ṭhup laiin rorelna sang berah hawihhâwmna leh dawhtheihna kan tlakchhamzia, House decorum kenkawh kawngah Speaker-in hna a tlin loh zia a lang chiang hlein kan hria," an ti a; MNF sorkarin insiamṭhat tumna a neih lohzia leh sum hman danah hmasawnna hawi zawnga ngaihtuahna an sèn lohzia a lang chiang niin an sawi.
Dan leh hrai zawm kawngah roreltute an hlawhchham chiang hle nia sawiin ZPM chuan, "Budget pharhnaah pawh Mizoram Fiscal Responsibilities and Budget Management Act, 2006-in a phût anga sum hmuh dan leh hmanna te, indaih lohna leh leibate chu state sum deh chhuah pumpui belh khawm (GSDP) aṭanga za zela a tam dan chu Medium Term Fiscal Policy Statement-ah tarlan tur a nih laiin, a sum zat leh a tam leh tlem lam amount-a a sawi chu mipui bum tumnaah kan ngai," an ti.
ZPM party chuan, ZPM MLA-te'n mipui aiawha sorkar khalh ngil kawngah te, ram leh hnam tana bill leh motion ṭangkai put luh tuma theihtawp an chhuahnaah te, Zo nun ze mawi lan chhuahtir kawngahte theihtawp an chhuah chu lawmawm an tih thu an tarlang bawk.