Champhaiah in sak ṭanpui dilna 102 pawm

Champhai District Screening Committee on PMAY-HFA Urban chu nimin khan an chairman Henry C Lalrawnkima, district bawrhsap mawhphurhna la mektu hoin DC conference hall-ah an ṭhu a; ṭanpui dilna 102 an pawm.

Pradhan Mantri Awas Yojana - Housing for All (PMAY-HFA Urban) hi khawpuia chêng, mahni puala chenna in nei lote tana in sak ṭanpuina a ni a, District Screening Committee chu hamṭhatna dawngtu tur thlangtu a ni.

Henry C Lalrawnkima chuan, in sak ṭanpuina dawng thei tur leh mamawhtute’n an dàwn ngei theih nan hmalak a ṭul thu a sawi a, “Scheme-in a tumte hlawhtling taka kalpui a nih theih nan thawktu zawng zawngte’n theihtawp chhuah a ṭul. Hamṭhatna dawng tura thlante pawhin rinawm taka an hmabakte an hlen zel a pawimawh,” a ti.

District Screening Committee on PMAY-HFA Urban secretary R Lalnunkimi tarlan danin, Champhai khawpuiah mi 958-in in sak ṭanpuina first instalment an dawng tawh a, mi 688-in second instalment leh mi 537-in third instalment an dawng tawh. Geotag tih vek tawh, sum dawn veleha pek mai theih tur first instalment hnuaiah mi pali, second instalment-ah mi 23 leh third instalment-ah mi 56 an awm.

Ṭanpuina dawng tura thlan zingah chhan hrang hrang vanga paih ngai an awm avang leh a thlakna tur siam a ṭul avangin ṭhukhawm chuan Champhai South bial aṭanga rawtna lut 71 zinga 62 leh Champhai North bial aṭanga rawtna lut 43 aṭanga 40 an pawm.

Ṭhutkhawmah hian Champhai SDO (Sadar) Lalnunfela Chawngthu, Champhai North leh South bialtu MLA aiawh te, bank hotute leh VC hruaitute an tel a ni.