SYS Minister-in Falkawn field tur a en

Sports & Youth Services (SYS) minister Robert Romawia Royte chuan March 9, Nilaini khan Falkawn khelmual laih zauh dan tur a en a, hna ṭan thuai a nih tur thu a sawi.

Khelmual ennaah hian Robert Romawia Royte chuan, Falkawn khawtlangin State Referral Hospital sakna atan an khelmual hman lai an pe tih a hriatin ram tana an thilphalna ropui a tih thu a sawi a, “Engineer-te’n an survey nghal ang a, hna pawh ṭan thuai tum a ni ang,” a ti a, Falkawn khelmual chu Assembly House-a assurance a pek awmchhun a nih thu a sawi.

Falkawn khelmual thar tur hi bialtu MLA F Lalnunmawia fund Rs 6,00,000 hmangin laih a ni tawh a, Assembly budget session neih mekah laih chhunzawm a rawtna chu SYS Minister chuan laih chhunzawm turin a tiam a ni.