Alternate Gravity WSS 60.10% zo tawh

Nimin Assembly session-ah PHE changtu dy. chief minister Tawnluia chuan Alternate Gravity Water Supply Scheme thawh mek chu physical achievment 60.10% a nih tawh thu ZPM Legislature Party leader Lalduhoma zawhna chhangin House a hrilh.

Tawnluia chuan Alterante GWSS hi M/S Gram Infracon Pvt. Ltd. leh Vikas & Associates (JV), Noida-te’n an thawh thu sawiin, “Estimate chu cheng nuai 11,900 a ni. Hetah hian state GST cheng nuai 480.35 a tel a, central-in ni 4.12.2018 khan state GST tel loin cheng nuai 11,419.65 a rawn sanction a ni. A hna pumpui hi tender a ni a, contractor hian cheng nuai 11,250 in a rawn chhang a, pawm a ni,” a ti.

Dy. Chief Minister sawi danin, contractor chhannaah state GST a tel loa, contractor-te’n state GST exempt tura an ngen angin, state sorkarin a exempt a ni. September 12, 2019 ah hnathawh ṭan a ni a, June 30, 2022 ah zawh tur a ni. Tun dinhmunah physical achievement 60.10% leh financial achievement 72% a ni.

A cover tur area chu Muallungthu tlanga tuizem aṭanga a chawm theih Aizawlah - Mualpui, Mission Veng, Mission Vengthlang, ITI, Model Veng, College Veng etc. bakah Muallungthu, Falkawn, Melriat, Kelsih, Hualngohmun, Samtlang, North Lungleng leh Lungleng-I te an ni.