March-ah hripui vei mi 4,977 hmu tawh

March 9, Nilaini khan Mizoramah Covid-19 vei mi 474 hmuh chhuah a ni a, RT-PCR hmanga swab sample endik zat leh positive hmuh zat a tlem ber. Nimin khan hripui vei dam tawh mi 548 chhuahtir an ni a, Covid-19 vei mi pakhat a thi. March thla chhungin Covid-19 positive mi 4,977 hmuh a ni tawh.

Covid-19 vei Nilainia hmuh tharte chu mipa 220 leh hmeichhia 254 an ni a; RT-PCR laboratory-a hmuh chhuah mi 17, TrueNAT hmanga hmuh 46, RAT hmanga hmuh 402 leh FIA hmanga hmuh mi pakua niin, positivity rate chu 17.60% a ni.

Nimin khan hripui vei dam tawh mi 548 chhuahtir an ni a, district tina chhuak zat chu - Aizawlah mi 148, Mamitah 126, Serchhipah 68, Saitualah 59, Lungleiah 51, Hnahthialah 41, Khawzawlah 33, Champhaiah 19 leh Kolasib-ah mi 13 an ni.

IDSP record angin, Mizoramah Covid-19 vei 2,19,630 hmuh chhuah a ni tawh a, mipa 1,02,535 leh hmeichhia 1,17,095 an ni a, mipa aiin hmeichhia 14,560-in an tam zawk. Nimin tlai dar 5 thleng khan mi 2,15,800 (98.26%) chhuahtir an ni tawh a, mi 666 (0.30%) thi tawhin, enkawl mek mi 3,164 (1.44%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,19,630 chu mi 1,000 zelah hripui vei mi 200 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah March 9, 2022 thlenga swab sample endik tawh 18,59,816 aṭanga positivity rate chu 11.81% a ni a; RT-PCR hmanga endik zat percentage chu 19.99 a ni a, RAT hmanga endik zat chu 74.35% a tling.