KHAWTHLIR

SEDP Board senso nuai 297
Finance changtu chief minister Zoramthanga chuan INC member C Ngunlianchunga zawhna ziaka chhangin, SEDP hnuaia board 14-te kum khat chhunga enkawlna atana sum hman ral zat chu cheng nuai 297.38 a nih thu a tarlang.

Inbuatsaihna thlirho
State election commissioner Laima Chozah hoin nimin khan sorkar hotute'n Siaha DRDA-ah Mara Autonomous District Council (MADC) hnuaia MDC General Election vawi 12-na awm tura inbuatsaihnate an sawiho. Laima Chozah chuan, sorkar official bakah, VC, MJA, political party, NGO leh Siaha district mipui zarah inthlanna dik leh felfai a awm a beisei thu a sawi.

Online registration
Mizoram State Veterinary Council hnuaia vety doctor-te tana buatsaih online registration chu nimin khan AH&Vety director Dr Lalremliana'n a hawng. Online registration hmang hian certificate tibo leh tihnun ngaite tan download leh renewal a tih theih a ni.

SDGs zirho
Planning & Programme Implementation department chuan nimin khan Lawngtlaia Central YLA Hall-ah sorkar line department leh khawtlang hruaitute pualin Sustainable Development Goals zirhona leh thlirhona an buatsaih a, mithiamte'n thil pawimawh hrang hrang an sawifiah.

Zophai hriatrengna hun hman a ni
Mizo Zirlai Pawl General Headquarters chuan nimin khan March 10, 2018-a Zophai, Bairabi-a Assam police-te'n zirlaite kut an thlak hriatrengna hun an hmang. MZP chuan, "Zophaia Mizo zirlaite tawrhna kha kan hre reng a, kut tuar leh thisen chhuak zawng zawng te, bungrua chán zawng zawngte kan theihnghilh lo a, ram leh hnam tana tuartu zawng zawngte zahna chibai kan bûk a ni," an ti a, Mizoram sorkarin ramri buai chingfel turin chak lehzualin hmala chhunzawm se an duhthu an sawi.