Dan loa kuhva tawlh vanga Assam Police-te zawnlai Abub Mazumdar-a'n Mizoram sorkarah buhfai a supply

Commerce & Industries minister Dr Lalthangliana'n INC member Lalrindika Ralte zawhna ziaka a chhan danin, Mizoram sorkara buhfai supply-tu zingah Assam sorkarin man tuma an zawn mek Abub Ahmed Majumdar, Silchar a tel.

Tarlan tawh angin, Assam media-te chuan Abub Majumdar chu dan loa kuhva tawlh rûknaa an hotupa a nih avangin Assam police-te'n an zawn mek thu tun hnaiah an tarlang.

Abub Majumdar hi Delhi-a Assam House-a Assam chief minister Himanta Biswa Sarma leh Mizoram chief minister Zoramthangate'n zanriah an kîl dun ṭumin a tel ve a, Mizoram Chief Minister's Office leh MNF party-te chuan CM Zoramthanga sàwm a ni lo niin an tarlang a; BJP Mizoram lam chuan zanriah kilnaah hian Mizoram lam sawm ngei a nih thu an tarlang ve thung.

Commerce & Industries Minister-in zawhna a chhan danin, ZIDCO-in Mizoram sorkarah buhfai quintal 6,20,000 an supply tawh a, buhfai supply-na aṭangin cheng nuai 105.75 an hlêp tawh.

ZIDCO kaltlang hian mi pariatin buhfai an supply a, chu'ngte chu - Run­rem­sangi, Chaltlang, Aizawl; Abub Ahmed Majumdar, Silchar, Assam; Johny Lalduhsaka, Luangmual, Aizawl; Lalzam­mawia, Kolasib Venglai; F Aithanga, Chaltlang, Aizawl; C Lalrampari, Mission Vengthlang, Aizawl; Hmingdailovi, Mission Veng, Aizawl leh Lalṭhuama, Kolasib Venglaite an ni.