Lengpui Airport siam lai a chim ; Lengpui Airport hi kan chei zawh hunah hmarchhaka a ṭha zinga mi a ni dawn - Chief Minister

Lengpui Airport chei ṭhat hna thawh mek chu nimin tlai dar 4:30 vel khan a chim a, hnam dang pahnih an hliam. Hetih lai hian nimina Assembly session-ah chief minister Zoramthanga chuan, Airport chei ṭhat hna zawh a nih hunah chuan hmarchhak state-a airport ṭha berte zinga mi a nih dawn thu a sawi.

Lengpui aṭanga thu dawn danin, Airport chei ṭhat meka chim lai hi terminal building-a baggage make-up area (BMA) a ni a, a chim chin hi sq.ft. 50 vel a ni. A chim lai hian ni tin (daily)-a inhlawh ṭhin hna thawkte chu an bâng tawh a, hna thawktu tlem azawng erawh an la awm.

Lengpui Airport chei ṭhat lai chima hliam zinga pakhat chu Civil Hospital, Aizawlah nimin tlai khan hruai nghal a ni a, pakhat zawk erawh chu a hliam na lo thung.

MNF member Dr Vanlalṭanpuia zawhna chhangin Chief Minister chuan, "Lengpui Airport chei ṭhat nan kum 2021-22 sorkar kum chhungin sorkarin a hranpain state budge ah pawisa a dah lo. Tun dinhmunah Airport Authority of India (AAI) hnena hlan tumna a awm lo a, a chhan chu AAI leh Mizoram sorkar inkarah inremna a awm theih loh vang a ni," a ti.

CM Zoramthanga chuan, AAI-in an hnena Lengpui Airport hlan turin Mizoram sorkar a nawr nasa ṭhin nia sawiin, "Anmahni pawhin airport an enkawl hi privatise tuma an beih char char lai a ni. An airport enkawl ho an ṭhang lo," a ti a, AAI kuta hlan a nih chuan airport-in hma a sawn loh an hlauh thu a sawi.

Lengpui Airport chu a neituin tih tak zeta an enkawl avangin a ṭhang chak nia sawiin CM Zorama chuan, "A chei ṭhat hna kan thawh mek hi a zawh chuan hmarchhakah a ṭha berte zinga mi a ni dawn," a ti

Chief Minister chuan, airport dang siam tumna Mizoram sorkarin a neih rih loh thu sawiin, "Pakhat enkawl pawh a hautak hle. Air Force hoin an sawi deuh a, Saitlûk lamah en turin kan ti. Hmarchhaka an hotute pawh kan hrilh tawh a, hma an la la rih lo," a ti a; state sorkar anga airport siam chu a hautak êm avangin project-ah an la nei ngam rih lo tih a sawi.

Assembly session neih zawh taka zawhna chhannaa a lan danin, Lengpui Airport chei ṭhat hna hi Zoramchhana, Electric Veng, Aizawl leh KR Constructions-in an thawk a, KR Constructions hi Kamrul Lashkar (Kamlova Chhangte) ta a ni.