Inthlan atan cheng nuai 5,275 ruahman ; Finance-in nuai 3,250 a pe chhuak tawh

Mizoram Assembly inthlanpui awm tur atan cheng nuai 5,275 hman tura ruahman a ni a; Finance department chuan Direc­torate of Election-ah nuai 3,250 a pe chhuak tawh a, chu'ng zinga nuai 150 chu central armed police force (CAPF) enkawlna tur bika pek chhuah hmasak a ni. MLA inthlan bika sum senso zawng zawng chu state sorkar tum vek tur a nih thu an sawi.

Finance department hotute sawi danin, Mizoram Election department-in Assembly inthlanpui awm tur atan a tìra Finance department-a sum an mamawh zat an hriattir dan chuan, District Election Office zawng zawnga hman atan cheng nuai 3,775 leh Election directorate-a hman atan cheng nuai 400 a ni. CAPF company 40 chah luhte enkawlna atan Election Commission of India (ECI) aṭangin cheng nuai 1,100 a dawng dawn a; Mizoram inthlan atana sum mamawh zawng zawng chu nuai 5,275 a ni.

Cheng nuai 5,275 aṭang hian Joint CEO office chuan Finance department-ah cheng nuai 4,100 an dil tawh a, Finance department-in nuai 3,250 an pe chhuak tawh. Sum mamawh zat hi a tam avangin Finance department chuan tihtlem dan ngaihtuah turin Joint CEO office lam an ngen a, "Sum senso hi a tlakhniam kan beisei," an ti.

Inthlana duty tur CAPF chah luhna leh enkawlna senso atana cheng nuai 1,100 hman tur chung­changah Finance department hotute chuan, "CAPF rawihna tur bikah hian a tira kan lehkha hmuhah sum hmanna tur kimchang a inziak lo," an ti a; inthlan atana sum hmanna tur dang zawng chu Joint CEO Office aṭangin a hmanna tur kimchang nen an dawng vek tih an sawi.

CAPF enkawlna atana cheng nuai 1,100 hman tura tih chu a tam hlea an ngaih thu sawiin Finance hotute chuan, "A tirah sum hi allot turin min ti bik lo a, lo inring turin min ti a. Mahse, a tam avangin thuneitute'n an ngaihtuah ṭhat leh hnuah nuai 371-in a daih turah an ngai a, tunah hian nuai 150 kan pe rih phawt a ni," an ti.

Finance department hotute sawi danin, CAPF-te chu Mizoram an awm chhungin dearness allowance (DA), ei leh in, chenna tur, veivahna motor, etc. chu Mizoram sorkar tum vek tur a ni a, an hlawh erawh chu state sorkar tum tur a ni lo. Company pakhatah mi 100 awmin, company 40, an vaiin mi 4,000 chah luh tum a ni. Mizorama an awm chhungin damlo an awm chuan damdawi-inah an lut ang a, a thlawna enkawl an ni ang a, enkawlna man pek leh tur a ni. CAPF-te hian EVM strong room leh critical polling station-te an veng ang.

Lok Sabha inthlan leh Assembly inthlana sum senso tumtu chungchangah hriat fuh lo a awm ṭhin tih sawiin Finance department hotute chuan, "Assembly inthlan senso chu Central-ah a dil theih loh a, Lok Sabha inthlan senso erawh kan dil leh ṭhin. A ruala intlan a nih chuan intum sem tur a ni," an ti.

Election Commission website-a budget expenditure chungchang inziahnaah chuan, "If election are being held only for the parliament. The expenditure is borne entirely by the union government. While for the elections being held only for the state legislature, the expenditure is borne entirely by the concern state," tiin a inziak tih an sawi.

Kum 2013-a Mizoram Assem­bly inthlanpuiah khan Mizoram sorkarin cheng nuai 2,430 a sêng a, kum 2014-a Lok Sabha inthlanah cheng nuai 2,000 sen a ni bawk a; sorkar kum (financial year) khat chhunga mi ve ve a nih avangin a vaiin nuai 4,430 sen a ni.

Kumin 2018 Mizoram inthlan­puia sum senso atana ruahman nuai 5,275 chu kum 2013-a Mizoram inthlanpuia senso cheng nuai 2,430 aiin a lêt aia tam, cheng nuai 2,845-in a intam hleih a ni.