Candidate thubuai neite'n an thubuai Media-ah an puanzar a ngai dawn

Supreme Court thutlukna angin, November 28, 2018-a Mizoram Legislative Assembly inthlan awm tura candidate zinga Court thubuai nei leh Court-in thiam loh a chantir tawhte chuan an thubuai chungchang chanchinbu leh telivision-ah an puanzar ngei a ngai dawn.

Vanglaini palai zawhna chhangin Mizoram additional chief electoral officer (CEO) Lalzarmawii chuan, Supreme Court thutlukna chu MLA inthlan lo awm turah hman nghal a nihdawn thu a sawi a, "Hemi chungchang hi Information & Public Relation department-ah pawh puanzar tura thawn a ni tawh. Keini chuan a hranpain Court thubuai neite hi an thubuai chungchang media-a puangzar tur a nih thu hriattir kan tum lo," a ti.

Candidate-te bakah hian, political party-te pawhin an candidate zinga thubuai nei an awm a nih chuan an party hmingin an candidate thubuai neih dan an puangzar tur a ni. Inthlan zawhah an puangzar ngei a ni tih lantirna document nen candidate-in district election officer (DEO) hnenah an thehlut ang a, candidate-te chuan chief electoral officer (CEO) hnenah an thehlut bawk ang.

Thubuai nei candidate puanzar chungchang hi candidate tan chuan an dinna constituency huam chhungah tur a ni a, political party tan chuan state pum huapa puanzar tur a ni.

Thubuai puanzar dan tur
1) Candidate, thubuai nei tawh ṭhin (convict case) leh nei mek (pending case) chuan a dinna constituency chhunga chanchinbu lâr leh darhzau berah leh telivision channel-ahte an thubuai neih dan chanchin kimchang puanzarna, a tlem berah ni thum chhung tal Form C-I hmangin an ti chhuak tur a ni.
2) Chanchinbua puanzarna siam hun chu candidate-te inhnuhdawh theih hun tawp ber aṭanga chhiara vote thlak ni November 28 thlen hma ni hnih hma lamah chanchinbuah ni thum chhung aia tlem lo puanzar tur a ni. Kumin MLA inthlanpui bikah chuan November 15 - 26 inkarah ni thum chanchinbuah chhuah tur a ni.
3) TV channel-a puanzar tir hun chu vote thlak hun tawp aṭanga chhiar leta darkar 45 hma ngeiin tih tur a ni. Kumin inthlanpuiah chuan November 26 tlai dar 5 rik hma tihna a ni.
4) Criminal case puanzarna hawrawp len zawng (font size) chu 12 aia tê lo tur a ni a, chanchinbu chhiartute hmuh awlsam theihna laiah tarlan tur a ni.