ASI leh INATCH-te'n heritage site chungchang Governor an sawipui
Archaeological Survey of India (ASI) hotute leh INTACH, Mizoram Chapter hruaitute chuan nimin khan Raj Bhavan-ah Governor Kummanman Rajasekharan an kâwm a, Vangchhia khuaa Heritage Site chungchang leh hmalakna kal mekte an sawipui.
ASI Aizawl Circle-a archaelogist Dr Sujeet Jain chuan, ASI leh INTACH thawhhona bakah, Vangchhiaa ASI hnathawhte a lem nen Governor a hrilhfiah a, "Archaeologist-te zirna aṭang chuan Vangchhia khaw bula heritage site ang hi Mizoram hmun tam takah a awm a rinawn. Hma la thei tur leh sûlhnu hlui hai chhuak tur chuan
Mizoram hmun ṭhenkhat hi project site anga puan hmasak a ngai a ni," a ti.
Dr Sujeet Jain chuan, chhui chianna hrang hrang aṭangin Vangchhia khuaa hnuhma leh bungraw hmuhchhuahte chu Mizo thlahtute sûlhnuah bak ngaihruat theih a la ni rih lo tih sawiin, "Thil hmuhchhuahte upat zawng pawh hmun hnihah chhût chhuahtir a ni. A chhûtna hmun pakhat zawk, Florida, USA-a zirchianna ang chuan AD 1,400 vela chhût a ni a, mihring an awm ṭan hun erawh chu A.D. 600 vel anga rin a ni," a ti a; engmah finfiahna an la neih loh thu a sawi.
INTACH Mizoram Chapter convener P Rohmingthanga leh co-convener C Chawngkunga te pawhin Mizote ṭobul nia an hriatte leh mi dang dang sawi dante an sawi a; heritage site atan puan theih khaw dang pali - Farkawn, Dungtlang, Lianpui leh Lungphunlian te chu heritage site-a puan a nih thuai theih nan hmalaksak turin Governor an ngen a ni.