Congress party chhung buai ṭhelhin an campaign ṭha hman lo - Lalruatkima

MNF party-a general secretary Lalruatkima chuan, Congress party chu an party chhunga buai ṭhelha hun an hmang reng avangin an campaign ve hman lo niin a sawi a, BJP leh MNF chu engti kawng maha thawk dun thei an ni lo niin a sawi bawk.

Lalruatkima hian Dinthar Venga MNF campaign pisa a hawnnaah thu sawiin, "Congress party chhungkaw buaina a nasa lutuk a, inthlan campaign-ah neutral leh party dangah an campaign ṭha hman lo. Hmasawn zawnga kal chu sawi loh, an mite lungawi lo inthlan hmain an tuam dam hman dawn lo tih a chiang. MNF-in Congress kan ṭhiat hiau hiau a ni," a ti.

Congress party mangangin MNF chu BJP nena thawk dunah an mai nia sawiin Lalruatkima chuan, "BJP leh MNF hi engti kawng maha thawk dun thei an ni lo. BJP nena thawh dun loh hlaua bawkkhupa chibai bûk lo chauh chu Congress party hi an ni a, tunah pawh Chakma District Council-ah an la thawk dun reng a ni," a ti. ZPM pawh an chief ministerial candidate chu BJP nena vawi tam tak lo thawk dun tawh niin a sawi bawk.