FIR thehluh pawi an ti

Aizawl Football Club chuan thuchhuah siamin, Aizawl FC chungchanga FIR thehluh a ni chu pawi an tih thu an tarlang a, "Politics-a inbeiha atana FIR submit a awm ta mai hi a pawi kan tiin a mak kan ti hle," an ti.

Aizawl FC tarlan dan-in, Aizawl FC (Academy Section) chu registered society a nih angin, IDMI scheme hnuaiah ṭanpuina a dil a, kum 2015 khan cheng nuai 17.71 pawm a ni. Cheng nuai 17.71 aṭanga 25% chu Aizawl FC tum tur niin, a dang 75%, cheng nuai 13.28 chu sorkar laipui tum tur a ni thung. Guideline angin first instalment-ah cheng nuai 6.64 chu Aizawl FC account-ah kum 2015 khan thun a ni.

He scheme hi sorkar kalpui (implement) tur scheme ni loin, registered NGO/society tana scheme a ni a, matching share (25%) pawh sorkar tum tur ni loin, society tum tur a ni.

Aizawl FC academy hi North Lunglengah a awm a, IDMI scheme aṭanga sum hmun cheng nuai 6.64 leh scheme atana sum hmuh cheng nuai 17.71 aṭanga society matching share cheng nuai 4.43 (25%) chu hman a ni. Aizawl FC registered office awmna chu Dawrpui Veng a ni a, chu vang chuan Human Resource Development Ministry sanction order-ah pawh Aizawl FC academy chu, Dawrpui tih a ni.