Tripura camp-a Mizoram Bru-te'n Kanhmunah vote an thlâk dawn

Mizoram chief electoral officer (CEO) thar Ashish Kundra chuan, Tripura relief camp-a Mizoram Bru-te chu Kanhmun, Mizoramah vote thlaktir an nih dawn thu a sawi a, "Hemi chung­chang hi All NGO Coordination Committee-te pawh ka sawipui tawh," a ti.

Ashish Kundra hian nimin khan nimin khan CEO pisa conference hall-ah press conference a neihnaah Tripura-a Mizoram Bru-te tan Kanhmun khuaah vote thlakna tur hranpa siam a nih dawn thu a sawi a; zawhna chhangin, "Polling station siam zat tur leh Bru-te Tripura aṭanga hruaina (transportation) turte chu Election Commission of India (ECI) aṭanga instruction kan hmuh hunah kan buaipui ang," a ti. Bru-te Kanhmuna vote thlaktir chu Joint NGO hruaitute a sawipui tawh a, an hriatthiampui nia a hriat thu a sawi.

CEO chuan, "Mizoramah thil duh­awm lo a thleng a, Mizo mipui zawng zawng lawm lohna a ni. Thil thleng tawhte theihnghilhin hma lam hun i thlir ang u. Inthlanna thianghlim leh dik a awm ṭhin avangin central armed police force chah luh chungchang pawh Mizo mipuite ka hriatthiam pui che u," a ti a; ECI duh danin venhimna thilah CAPF chah luh a ngai tih sawiin, "Company 20 an rawn thleng tawh a, company 20 dang an la rawn thleng lo," a ti.

A thawhpuite leh amah chu ring tâwk tura Mizo mipuite ngenin Ashish Kundra chu, "CEO hi min ring tawh rawh u. Officer ṭha tak tak thawhpui ka nei a, inthlanna thianghlim leh felfai a awm theihna atan hian zanah nen hna kan thawk a ni. Mizorama inthlanna thianghlim leh felfai a awm ṭhin hi kan chhunzawm theih lohna tur ka hre lo," a ti a; dan angin hna an thawh zel tur thu a sawi.

Mizoram CEO chuan Kolasib district election officer Dr Arun T-a'n Tripura relief camp-a Bru-te electoral roll-a a thun chungchang sawiin, "Kolasib NGO-te'n an duh lo a, Gauhati High Court-ah PIL an thehlut a, tunah chuan Court thuhnuaiah a awm tawh. Chhanna pek a ni ang a, Court chuan thutlukna kan nghah a ngai dawn a ni," a ti.

Ashish Kundra chuan Mizo mipuite'n vote thlak vek se a duh thu sawiin, "Vote nei zawng zawngte vote thlak vek turin ka sáwm a. NGO-te bakah Mizo mipui zawng zawngte inthlanna thianghlim leh felfai a awm theihna atan hian kan thawhpuiah kan ngai a ni," a ti a; Mizoramah inthlanna thianghlim leh felfai a awm theihna atan theihtawp an chhuah thu a sawi.

Inthlan sawn hlat chungchanga Vanglaini palai zawhna a chhannaah Ashish Kundra chuan sawn hlat theih leh sawn hlat kher loh theih a nih thu a sawi rualin, ECI thutlukna an nghah thu a sawi a, "Mawhphurhna ka la chauh a, inthlan atana inbuatsaihna hrang hrangte ka thlir ang. Inthlan atana inbuatsaihnate peih a nih tawh chuan inthlan sawn hlat a ṭulna chhan tur ka hre lo. Tunah chuan ngaihdan engmah ka sawi thei hrih lo," a ti.

Mizoram CEO sawi danin, kumin inthlan atan hian ṭum danga tih ngai loh angin photo voter slip sem a ni dawn a, inthlan hma ni ngaah chuan booth level officer (BLO)-te'n an bial ṭheuha voter-te hnenah an pe vek tawh dawn a ni. Ṭum dangah pawh voter slip sem a ni tawh ṭhin a, mahse, thlalak a chuang tel ngai lo.

Kumin inthlan turah hian polling station 38 chu vulnerable polling station atan puan a ni a, chu'ngte chu ramri hnaiha awm a ni deuh ber. Polling station 32 chu critical polling station a ni a, chu'ngte chu kum 2013 inthlana vote tlak ṭhatna leh candidate pakhat an vote hukna polling station a ni deuh ber. Polling station 14-ah chuan webcasting (vote thlak lak live-a tihchhuah) tih a ni ang.