Mizoram Police-ten Mipui ṭawiawmna an ngen

Mizoram Police chuan thuchhuah siamin, rálmuang leh boruak ṭha tak hnuaia Mizoram inthlanpui neih a nih ngei theihna atan mipui, tlawmngai pawl leh political party-te ṭawiâwmna an ngen.

Mizoram mipuite ṭawi­awmna zarah boruak muan­awm tak kan nei chho mek zel tih tarlangin Mizoram Police chuan, "Mipui hnena kan ngenna ngai pawimawhin, boruak duhawm lo, dan leh thupeka harsatna lian tham leh inthlanpui tisukuk thei tun thlenga a awm lo hi a lawmawm hle," an ti a; NGO-leh Mizoram Kohhran Hruaitu Committee hruaitute inpekna lawmawm an tih tak zet thu an sawi.

Police thuchhuah chuan, "Rálmuang tak leh boruak ṭha tak hnuaiah Mizoram inthlanpui hi kan neih ngei theih nan mipui, NGO leh political party zawng zawngte ṭawiawmna kan ngen nawn leh a ni," a ti.

Police tarlan danin, inthlan atan hian police-te'n kawng hrang hrangin inbuatsaihna an kalpui mek a; state dang aṭanga force duty turte pawh tluang taka lo thlengin, duty hrang hrang - static surveillance team, flying squad, quick response team, patrolling, naka/check post, etc. ahte pawh duty uluk taka kalpui a ni.

Tun hnai thla khat leh a chanve chhungin rakzu Rs. 5,36,900 hû, sap zu Rs. 1,78,760 hû, methamphetamine Rs. 2,12,10,000 hû, heroin Rs. 14,89,100 hû, ganja Rs. 3,500 hû, pawisa lem Rs. 9,58,000, ruihhlo hralhna sum Rs. 73,200 an man bakah, rakzu siamna hmanrua Rs. 52,86,000 hû an tichhia a ni.