ZPM leh independent chungchang sawifiah

Zoram Peoples' Movement (ZPM) Steering Committee senior vice president Dr Kenneth Chawngliana chuan nimin khan Aizawl Press Club-ah thuthar thehdarhtute a kâwm a; tun ṭum Assembly inthlanah ZPM candidate-te independent candidate anga an inziah luh a ṭul chhan a sawi bakah, ZPM chuan inthlan hma leh inthlan hnuah BJP an thawhpui loh tur thu a sawi nawn.

Dr Kenneth Chawngliana chuan, ZPM chu August 15, 2017-a din a ni a, kum khat chauha upa a ni tih sawiin, "ZPM hi pawl thar diai, tun hi inthlan kan chuh hmasak ber tur a nih avangin, kan pawl candidate-te pawh Independent-a kan chuhtir vek a ngai a ni. Inthlan zawha MLA kan neih zat emaw, vote kan hmuh zat emaw, Election Commission-in a tuk zat kan neih hunah chauh recognised party, reserved symbol nei thei kan ni ang," a ti.

A sawi danin, ZPM-ah chuan political party pahnih MPC leh ZNP-te bakah, Zoram Exodus Movement, Mizoram People’s Party, Mizoram Democratic Front leh Mizoram Reformation Front-te an tel a; MPC leh ZNP chu recognised party ni sa mah se, ZPM-ah an inchhûn luh vek avangin an party symbol leh flag an dahṭha a ni.

Mizoramah political party dangte pawhin independent-in an lo chuh ve tawh ṭhin. Union territory nih lai, kum 1978-a inthlanpuiah Congress party chu an keh phel lai leh symbol an inchuh lai a nih avangin Mizoramah pawh Congress symbol 'Bawng pahnih lei lehna hnûk lai’ an hmang thei bik lo a, an candidate-te pawh independent candidate vek niin, election symbol atan free symbol 'Chawngzawng' an hmang.

Kum 1987-a Mizoram state-a inthlan hmasa berah MNF chu recognized party an nih loh avangin an candidate-te chu indepdendent candidate vek an nih rualin, MNF candidate tia hriat an ni tho. An MLA thlan ta 24-te pawh result ziahnaah 'Independent' tih vek an ni.

Dr Kenneth Chawngliana chuan, tun ṭum inthlana ZPM candidate-te independent candidate anga ziah luh an nihnaah buaina tur a awm lo tih sawiin, tun hmaa Congress leh MNF candidate-te independent candidate an lo nih tawh dan nen a inang reng tih a sawi a, "Independent-a thlan tlin an nih avangin inthlan zawhah an buai phah lo. ZPM-in kan candidate-te independent-a kan chuhtir avang leh free symbol zinga mi 'Lukhum parh' kan hman vanga kan MLA-te dinhmun derthâwng bik tur anga sawi hi ‘ZPM huphurh vang’ leh ‘An thihsual chalchàng aw’ ni maiah kan ngai," a ti.

ZPM Sr. Vice President chuan, October 24, 2018-a candidate an puannaah ZPM candidate-te chu Val Upa Council ruahmannain thu leh ziakin rinawmna thu tiamtir vek an nih bawk thu a sawi.

Kenneth Chawngliana chuan, ZPM-in inthlan hma emaw, inthlan hnuah emaw BJP an thawhpui dawn lo tih a sawi nawn a, ZPM hi lungphum pathum - kan ram a him tur a ni, kan hnam a him tur a ni, kan sakhua a him tur a ni, tih nei leh nghet taka vuantu kan nih avangin BJP kan thawhpui thei lo," a ti.

ZPM Sr. Vice President chuan, Tuichawng biala ZPM-in candidate an dah loh chhan chu - NGO Coordination Committee-in party tinte an ngenna tihhlawhtlin an duh vang a nih thu a sawi a; kumin Mizoram Assembly inthlanpuiah thil mak thlentir a, sorkarna siam ngei an tum thu a sawi bawk.