KHAWTHLIR

Chawlh puang
Chief Secretary chuan nimin khan thuchhuah siamin, Mizoram MLA inthlan atana vote thlak ní, November 28, 2018 chu state holiday atan a puang. Chawlh puan a nih chhan chu, Mizorama sorkar hnathawk (central leh state), zirna-in leh banking institution-a thawkte'n inthlanah vote an thlak vek theihna atan a ni.

Thisen pe
MTP Tipa Vaihpi Branch chuan nimin khan Tipa (Tuipang)-a MTP Hall-ah blood donation camp leh awareness campaign an buatsaih a, Siaha District Hospital tan thisen unit 74 an pe a, a petute mipa 51 leh hmeichhia 23 an ni.

Agro Foods
Mizoram University-a Department of Horticulture, Aromatic and Medicinal Plant chuan nimin khan MZU-ah MZU-HAMP Agro Foods an buatsaih a, vice chancellor Prof. KRS Sambasiva Rao-a'n a hawng. MZU-HAMP Agro Foods hi horticulture lama thar chhuah sawngbâwl tawhte pho chhuahna a ni a; jam, jelly, juice, RTS, pickle, candy leh thil dangte pho chhuah niin, man tlawm zawka hralh a ni.

Lungdawh hawng
Maite khuaa Mizo Zaimi Inzawmkhawm leh Mizo Students Union-te'n Maite MSU Park-a Suakliana Lungdawh an siam chu nimin khan bialtu MLA R Lalzirliana'n a hawng.

SMB Secretary
Synod Executive Committee (SEC) chuan Synod Mission Board secretary atan Rev. C Zorammawia an thlang a, Synod Inkhawmpuiin a pawmpui chuan January 2019 aṭangin a chelh ṭan ang. December thla tir lamah Synod Inkhawmpui neih a ni dawn a, chuta tana inbuatsaihna atan SEC meeting vawi 275-na chu November 13-15 chhung khan Synod Office-ah neih a ni. October thla aṭang khan Committee peng hrang hrangte an ṭhu ṭan tawh bawk.

AMC hlan
Power & Electricty department chuan nimin khan Aizawl khawpuia street light-te chu Aizawl Municipal Corporation kutah an hlan a, inremna an ziak nghal. Inrermnaah hian P&E department aiawhin engineer-in-chief C Lalramliana'n hming a ziak a, AMC aiawhin commissioner Dr H Lalthangliana'n hming a ziak a ni.

Hâlpuah khap
Lunglei DC chuan thupek chhuahin, Lunglei district mipuite'n hlim tak leh thlamuang taka Krismas leh kumthar an hman theih nan thla hnih chhung atan an district chhungah hâlpuah, hâlmawi leh naupang silai lem lak luh, hralh, hâl leh hman a khap.

Gas agency hawng
Nimin khan The Grand Hotel, Aizawlah Nirmal Gas Agency hawn a ni. Nirmal Gas hi Shivaco Associates company hnuaia awm a ni a, Aizawlah dealer pahnih an nei. Agency hawn inkhawma tarlan a nih danin, Nirmal Gas Agency-in gas cylinder an zawrhte chu kg. 4, 6, 15 leh 17 a ni.