Mission VT MS-ah Science Fair

Mission Vengthlang Middle School chuan nimin khan an sikulah Science Fair leh Arts and Craft Exhibition an buatsaih a, Aizawl DC Dr A Muthamma-i'n a hmanpui.

Science Fair hi Pratham Science Foundation, Mumbai leh Aizawl Bawrhsap-te hmalakna RAHBI pilot project kal zel aṭanga buatsaih a ni a; zirlai naupangte buatsaih science model hrang hrang leh an kut themthiamna hmanga an siam chhuah thil chi 87 an pho chhuak. Mission Vengthlanga khawtlang hruaitu te, an veng chhung leh a chhehvela sikul hrang hrangte'n an hmanpui a ni.

Dr A Muthamma chuan, naupangte kutchhuak eng emaw zat phochhuah theih a ni chu lawmawm a tih thu sawiin, "Science thiamna hi heng model-te hrilfiah mai piah lamah, kan ni tin nun a ṭha zawnga nghawng thei turin a bulṭhut chiang taka hriat a pawimawh," a ti a; zirlaite chu zûk leh hmuama fihlîm tur leh mi dangte zûk leh hmuam ṭhat lohzia zirtirtu ni turin a fuih.