Bru rawn lette an rálmuang

Tlabung Progressive Society hruaitute chuan November 15, Ningani khan Tlabung Dinthara awm mek, tun hnaia Tripura aṭanga Bru lak lette chu an awmnaah an tlawh a; Bru-te chuan, tun dinhmunah an nun a rálmuan thu leh harsatna an tawh loh thu an lo hrilh.

Tlabung Progressive Society (TPS) hruaitute chuan, Tripura-a transit camp aṭanga hruai kîr Bru chhungkaw 19 chu Tlabung bul Dinthar khuaa an awm mek tih sawiin, Ningani khan a hmunah tlawhin an dinhmun an enfiah a, mi chi hrang hrang an kawm tih an sawi.

TPS secretary C Lalrintluanga chuan, tunlaiin social media-ah Mizoram Bru Indigenous Democratic Movement (MBIDM) intite'n Mizorama Bru-te dinhmun a him tâwk lo nia an thehdarh thu sawiin, "Bru-te dinhmun hi chiang lehzualin a hmunah ngei zir chian ṭhain kan hria a. Tripura-a awmte'n an awmnaa vote thlak an ngiat chhan nia sawi - Mizoramah vehimna ṭha tâwk pek an nih loh avang leh, hnam anga hnuaichhiah an nih vanga harsatna tâwk ṭhin nia an insawinate chu anmahni ká ngei aṭanga hriat ṭha kan tih avangin Bru-te hi kan kâwm a ni," a ti,

TPS hruaitute chuan, Dinthar khuaa awm mek Bru-te chuan, Mizorama an kîr hnuah harsatna an tawh loh thu an lo hrilh tih sawiin, "An tana harsatna thlen zawnga Mizo mipuite'n buaina an siam ngai loh thu te, an dinhmun a rálmuan lohna sawi tur an hriat loh thu te, Mizote nen inngeih taka an awmho thute an sawi a ni," an ti a; Tripura transit camp-a la awm mek ṭhenkhat chu an duh vang renga awm an nih loh thu an sawi tih an sawi bawk.

Hetih lai hian, Dinthara Bru-te chuan, an in sakna tura sorkarin ram a pek chu a zîm avanga an duhkhawp loh thu an sawi bawk.