MNF chuan BJP leh Congress Kan thawhpui ngai dawn lo - Zorama

MNF president Zoramthanga chuan nimin khan an party pisa Mizo Hnam Rûna inkhawmah thu a sawi a, "Pathian leh kan ram tan titu MNF leh BJP Hindutva hi a kal dun thei ngai lo ang. MNF chuan BJP leh Congress a thawhpui ngai dawn lo," a ti.

Zoramthanga chuan, MNF chu BJP nen an thawk dun lo nia sawiin, "Kan boruak a ṭhat avangin 'BJP nen in thawkho' tih dâwt thu an sa nawn tluk tluk a, sawi tawh hnu pawh sawi nawn a ngaih phah leh ṭhin. BJP-in bial 40 awmah bial 39-ah candidate an nei a, keini'n bial 40-ah candidate kan dah kim vek," a ti a, chu chuan an thawh dun lohzia a tichiang niin a sawi.

Congress party chu tun thlengin CADC-ah BJP nen an la thawkho reng tih sawiin, "BJP nena thawkho zawk chu Congress an ni. MNF chuan tumah kan thawhpui lo ang, BJP leh Congress hi kan thawhpui ngai dawn lo. MNF chuan BJP a hlau lo a, Congress pawh a hlau hek lo. Keini Pathian leh kan ram tan titu MNF leh BJP Hindutva hi a kal dun thei ngai lo ang, an ideology pawh kan hlau chhetê lo," a ti.

MNF President chuan, Parliament-ah ṭhuang hnih lian NDA leh UPA a awm tih sawiin, "Congress duh lo lam chu NDA-ah kan awm a, hetah hian MNF, ZNP leh MPC pawh kan tel. Chutiang chiah chuan, North east-ah NDA péng, Congress duhlo party hrang hrang kal khawmna NEDA a awm a, NEDA-a kan awm avang hian BJP kan thawhpui tihna a ni lo," a ti a; MKHC-ah kohhran hrang hrangte an awm nen a inang reng niin a sawi.

Nimina MNF inkhawmah hian tun hnaia Mizoram hmun hrang hranga MNF village council thar 44 leh MNF local council thar pariat an lawm a ni.