Kuhva rah tawlh rûk kaihhnawihah Assam-in Abub Majumdar an man

Abub hi Assam-Mizoram CM zanriah kîlnaa tel leh Mizoram tana buhfai supply-tu a ni.

Myanmar lam aṭanga dan loa kuhva rah tawlh rûk leh sumdawnnaa a bul tumtua puh, Abub Ahmed Majumdar, Silchar, Assam chu tun hnai khan Assam police-te'n an man. Abub Majumdar hi November 25, 2021 zana chief minister Zoramthanga leh Assam CM Himanta Biswa Sharma ten Delhi-a zanriah an kîl dunnaah a tel bakah, Mizoram sorkara buhfai supply-tu a ni.

Barak Bulletin tarlan danin, hun rei tak an zàwn hnuah Abub Majumdar chu Assam police-te'n tun hnai khan an man a, Dholai Police Station-ah thu zawhfiah a ni. Man a nih hma hian a ṭhuihhruai ṭhenkhat chu man an lo ni tawh.

Tarlan tawh angin, Mizoram Chief Minister Office leh MNF party-te chuan thuchhuah siamin, Mizoram leh Assam chief minister-te'n Delhi Assam House-a zanriah an kîl dunnaa tel ve Abub Majumdar chu CM Zoramthanga sàwm a ni loh thu an tarlang. Hetih lai hian BJP, Mizoram Pradesh chuan zanriah kîlnaah hian Abub Majumdar chu Mizoram CM ṭawiawmtu a nih thu an tarlang thung.

CMO thuchhuah chuan, Mizoram leh Assam CM-te'n zanriah an kîl dun thu tarlanah thu dik tâwk lo a awm thu tarlangin, "Zanriah hi Mizoram CM-in a buatsaih anga ziah a nih laiin, Assam CM-in a buatsaih a ni zawk a, ani sàwmna angin Delhi Assam House-ah zanriah hi Mizoram CM hian a va kîlpui a ni," a ti.

CMO tarlan danin, Zoramthanga chu Delhi Mizoram House Resident Commissioner, OSD to CM leh Addl. PS to CM-te'n an ṭawiawm a, anni tih loh chu ṭawiawmtu an awm lo a ni. Mizoram BJP erawh chuan, Assam CM Office an biak thu tarlangin, "Abub Majumdar hi Assam CM party zinga mi leh Assam CM team a ni lo a, Mizoram CM party zinga mi a ni. Thlalakah pawh a chian thu BJP Mizoram hruaitute an rawn hrilh," an ti a; Abu Majumdar chu Assam VIP team zinga mi ni se, Assam sorkarin man a tum an rin loh thu an tarlang.

Hetih lai hian, Assembly session neih zawh tâkah INC member Lalrindika Ralte zawhna ziaka Commerce & Industries minister Dr Lalthangliana'n a chhân danin, Mizoram sorkara buhfai supply-tu zingah Abub Ahmed Majumdar hi a tel.

Barak Bulletin-in a tarlan danin, Abub Majumdar hian Mizoram sorkara thuneitu sang zingah thawhpui a nei a, chumi hmang chuan awlsam takin duty-te paltlang theiin, dan loa kuhva rah hmanga sumdawnna a kalpui a ni.

Mizoram Assembly budget session neih zawh takah khan ZPM Legislature Party leader Lalduhoma chuan, Abub Majumdar nupui neihnaah Mizoram minister zingah tel an awm thu a sawi a; nupui a neih ni chu April 29, 2019 a nia sawi a ni.

Lalduhoma chuan, Zoramthanga kaihhruai sorkar, December 2018-a lâk luhnaa tel turin Abub Majumdar chu sawm a nih thu te, CM banglaa MNF sorkar thar lawmnaah pawh telin, choka lam in-charge a nih thute a sawi bawk.