Airport siam lai chim chungchang: Rang taka siam a ni ang - CM Zorama

Lengpui Airport chei ṭhat mek, March 10, Ningani tlaia chim ta chu nimin khan chief minister Zoramthanga'n a hmunah a tlawh a, in sak lai chim ta chu rang taka siam a nih tur thu a sawi.

Lengpui Airport a tlawh zawhah Chief Minister chuan a Instagram account-ah, "Kan airport chei ṭhat mek leh hmalakna hrang hrang tam tak zinga nimin tlaia slab chhûn chim pawh PWD official leh Aviation lam hotute nen kan enho nghal. Existing structure stability-te monitor a nih hnuah rang taka siamṭhat leh nghal vek a ni ang," a ti.

Slab chhûn lai chim chungchangah Public Works Department (PWD) pawhin nimin khan sawifiahna an tichhuak a; slab dona mau pelh vanga chim a nih thu an tarlang.

PWD chuan, 'Improvement/ Upgrada­tion of operational/ non-operational facilities of Lengpui Airport under NESIDS' hna thawh meka slab chim chu Airport terminal building sira baggage make-up area a nih thu tarlangin, "Thi leh hliam na lutuk an awm lo a, vanneihthlak kan ti hle. Hetianga beisei loh taka thil a lo thleng ta mai hi Mizoram PWD chuan pawi kan ti tak zet a ni," an ti.

PWD tarlan danin, baggage make-up area hi sq.metre 520.02-a zau niin, sq.m. 238.50 chu slab chhûn zawh tawh a ni a, a bâk sq.m. 281.50 chhûn lai mek chu a chim a ni.

Slab chu lei aṭanga metre 6-a sang a ni a, a chim chhan ber nia lang chu - form work/shuttering chhâwng thuma mau leh thing hmanga do chu slab chhûn lai tihmuk nana vibrator an hmanin a dona mau ṭhenkhat a tihpelh vang a ni.

In sak lai chim hi nimin zing khan contractor leh engineer-te'n a hmunah an enho a, inremna (contract agreement) angin contractor chu sum sên belh awm loa siamṭha leh tura hriattir nghal a nih thu PWD chuan an tarlang.