Airport-a chhiatna thlen chhan ZPM-in chhui chian an phût

ZPM Legislature Party (ZLP) secretary Dr Vanlalthlana leh ZPM hruaitu ṭhenkhatte chuan nimin khan Lengpui Airport chei ṭhat hna thawh lai chim an tlawh a; chhiatna thlenga mawhphurtu zawng chhuak a, dan anga hremna pe ngei turin Mizoram sorkar an phût.

ZPM hruaitute chuan, Lengpui Airport-ah chhiatna a thleng leh, hna thawktu zingah hliam an awm te, hmasawnna sum tam tak engmah loa a chang ta chu pawi an tih thute an sawi a ni.

Dr Vanlalthlana chuan, Airport-ah cheng vbc. 47 chuang restricted tender-in hna pek a nih tawh thu Assembly session neih zawh tâkah tarlan a nih thu sawiin, "Mizorama sorkar department 49 kan neih zinga department 21 hian cheng vbc. 47 budget-ah an nei phak lo. Hetiang zat zet sum sen a ni chunga a chim thei hi kan ngaih a ṭha lo. He hnaah hian tute emaw manṭang ei an awm em tihte pawh session-ah kan sawi chhuak a, thil fel lo a awm a nih chuan a tàwp thlengin kan ûm zui ang," a ti.

Airport ṭha an duh thu sawiin Dr Vanlalthlana chuan, "Chhuang taka 'Hei hi kan airport a ni,' tih pawh kan duh. Amaherawhchu, hemi piah lamah mipuite'n thil mamawh tam tak kan nei. Tunah hian Health Care Scheme-ah cheng vbc. 59 vel sorkarin mipui sum a bá a, a pe thei lo. Hetih lai hian airport chei nan sum tam tak hman a ni," a ti a; Mizoramin central aṭanga a hmuh, a ṭul apianga a hman theih cheng vbc.18 vel airport chei nan hman a nih thu a sawi.