Lengpui Airport chei ṭhat mekah an hnathawh a chhe hle - CLP

Congress Legislature Party (CLP) member-te chuan nimin khan an leader Zodintluanga Ralte hoin Lengpui Airport chei ṭhat meka slab chhûn chim an enfiah a; hna thawh a chhiat thu an sawi.

CLP leader Zodintluanga Ralte chuan, Lengpui Airport chei ṭhat hna chu project lian tak a nih thu sawiin, "An thawh ṭan kan hriat tirh aṭangin Mizoram mipuite'n kan dem nasa. Pawisa a awm hma, work order pawh pek a nih hmain an duhsak záwng an thawhtir mawlh mawlh a ni. A hmunah ngei kan han en a, an hnathawh a chhe em em a, cement pawh awm mang loin a inchàr ṭha lo hle," a ti.

Zodintluanga chuan, slab chiah chim anga sawi a nih laiin, an endiknaah a ban bung hmuh tur a awm thu sawiin, "Hna a chhe em em a, a sakna hmanrua cement, balu leh rawra a inchawh pawlh ṭha lo hle a, kan tlawh lai ngei pawhin a la ro ṭha lo hle," a ti a, hnathawh a chhiat vang liau liaua chim a ni tih a chian thu a sawi.

Congress sorkar laiin tuna RD minister Lalruatkima'n lei chimte a tlawh a, 'Sorkar hnathawkte mawh a ni lo, a department changtu Chief Minister mawhphurhna a ni a, moral responsible lain a báng ngám tur a ni,' a tih ṭhin thu sawiin CLP Leader chuan, "Tunah hian PWD changtu Chief Minister hi báng turin a nawr ngam dawn em tih ka zawt a ni,” a ti.

CLP member-te chuan Lengpui Airport chei ṭhat hna zawng zawng chu CM fa chuam Kamrul-a leh CM tupa Zoramchhana te thawh vek a nih thu sawiin, "Hna thawhnaa tel ve ni ngeia ngaih theih turin CM pawhin Covid-19 avanga a zin chhuah ngam miah loh lai pawhin vawi tam tak Airport siamṭhat hnathawh a tlawh a ni," an ti a, chhiatna thlengah CM-in mawh a phur thûk hlea an ngaih thu an sawi.

In sak lai a chim chu pawi an tih thu sawiin CLP chuan, "A sak dan ṭhat lohzia enin, tunah chim lo pawh ni se, building hlauhawm tak ni zui thei tur a nih avangin sak zawh a nih hmaa hna chhiatzia hriat chhuah a ni hi lawmawm kan ti hle thung," an ti a; hnathawh dangte pawh thawh zawm tawh rih lo a, endik vek phawt ni se an duh thu an sawi.