NHM hnuaia thawkte'n lungawi lohna lantir dawn

National Health Mission hnuaia thawk intél khawm pawl, NHM Employee Union Mizoram (NEUM) chuan, sorkara an thil phûtte tihhlawhtlin a nih loh avangin lungawi lohna an lantir leh dawn.

Lungawi lohna lantir an tum chungchangah hian NEUM chuan nimin khan thuchhuah an siam a; "Press note kan siam tawh No. NEUM/2022/1 Dated the 25th Feb. 2022 anga kan hun tiam March 3, 2022 thleng sorkar kan nghak ang, kan tih hnu pawha vawiin thlenga sorkar aṭanga thu lawmawm leh inbiakna kan la nei lo," an ti a, chuvang chuan lungawi loh lantir nan March 14, 2022, Thawhṭanni aṭanga March 17, 2022 thleng badge dum bel an tum thu an puang a ni.

NEUM chuan, "Badge dum kan bel chhunga sorkar nena inbiakna emaw, kan lungawina khawp thu kan dawng lo emaw a nih chuan March 21-23, 2022 chhung hian mass casual leave lâk tum a ni," an ti bawk.NEUM hian an thil phût tihlawhtling tura sorkar kar nan December 17-19, 2021 chhung khan mass casual leave an lo la tawh a, December 20, 2021 zing dar 7-ah an titawp. Chawlh an lâk lai, December 19, 2021 tlai lam khan Mizoram sorkar chuan Health department hnuaia thawkte nawrh khapna thupek a tichhuak a ni.

YMA, Zawlbuk Group chuan, NH-54 kawngpui zauh hna thawktu Shivalaya company chu an sawisel laite an siamṭhat loh chuan March 20, 2022 aṭangin hna thawh an phal tawh dawn lo tih an puang. Zawlbuk Group YMA hruaitute chuan NH-54 kawngpui zauh hna thawh meka Tuirial-Baktawng inkar chu December 14, 2021 khan an lo endik tawh a; chumi ṭum chuan kawng kâwi ulh lai siam rem tur te, kawng dâwltu retaining wall ṭha lo siamṭha tur te, kawng kâwi lutuk laite tlân nuam zawka siamṭha turtein kawng siamtute an lo chah tawh a ni.

An sawisel laite chu March 8, 2022 thlengin siamṭha tura kutthlak a la ni loh avangin Zawlbuk group YMA hruaitute chuan nimin khan an enfiah leh a; Shivalaya company hotute hnenah siamṭhat ngai lai an hmuhte chu thlen nawn lehin, an siamṭhat thuai loh chuan March 20, 2022 aṭangin Zawlbuk Group YMA huam chhungah hna thawh an phal tawh dawn lo tih an hrilh a ni.

Zawlbûk Group YMA president C Vanzama chuan, "Kan duh ber chu kawng ṭha tak neih a ni. Kan thil phûtte hi thil harsa leh lian a awm lo a, an duh phawt chuan company hian an thawk thei turah kan ngai," a ti.