March 14 aṭangin sakei en theih a ni dawn Botany garden siam kan tum - EFCC Minister

Aizawl Sahuana sakei dah thar chu March 14, 2022 aṭangin mipui tan en theih a ni tawh dawn. Environment, Forest & Climate Change (EFCC) minister TJ Lalnuntluanga chuan, sahuan tihchangtlun zel an tum thu sawiin, "Botany garden siam kan tum," a ti.

Nimina Aizawl Sahuana thuthar thehdarhtute a kawmna­ah EFCC Minister chuan, sakei chu Mizo history-a bet tlat a nih thu sawiin, "Mizote'n sapuia kan neih sakei hi sahuana dah ngei turin sorkarna kan chàn hnuah hma kan la a, rual ú zawkte pawhin min phûrpui khawp mai. Sakei hi Mizo nunphunga hnuhma bet tlat a ni," a ti a, sahuana sakei an dah thei chu an lawm thu a sawi.

TJ Lalnuntluanga chuan, sakei chu an lei a nih loh thu sawiin, "Ramsa hi leì chhâwn chi a ni lo a, phal a ni lo. Sahuan dang nen Zoo Authority of India phalnain inthleng ṭhin a ni. Tun ṭumah hian Assam sahuan nen hauhûk nena sakei nupa inthleng tura tih a ni a, lak dawnah pakhat vanduaiin pakhat chiah kan la thei. Sahuan danga mi sakei pa la turin kan inbuatsaih mek," a ti.

Minister chuan, ramsa ngainatna leh ngaihhlutna neih theihna tur leh zirlaite'n an ṭangkaipui turin sahuan tihchangtlun zel an tum thu sawiin, "Aizawl Sahuanah hian ramsa chi hrang hrang 29 a awm a, a vaiin 202 an awm mek," a ti a, ramsa dah belh turin hma an lak zel thu a sawi.

Sahuanah nun tizang­khaitu atan botany garden siam an tum thu sawiin TJ Lalnuntluanga chuan, "JICA project hnuaiah Zoo Modernisation Scheme buaipui mek a ni a, botany garden leh recreation centre ni tura duan tum a ni. Hmunhma zau zawk mamawh a nih avangin, sahuan ram zauh dilna State Board for Wildlife remtihna lak a ni tawh a, ṭhenawm ram Home department hnuaia ram ruak dil mek a ni," a ti.