Covid-19 donaa hlawhchhamah Duhoma'n Mizoram sorkar a puh

ZPM leader Lalduh­oma chuan, Covid-19 hripui do chungchangah Mizoram sorkar chu hlawhchhamah a puh a, 'Pathian leh kan ram tan' tih thupuia hmangtute party-ah Mizo an chêp thu a sawi.

ZPM zawm tharte lawm luhna nimina Baira­bi Chhimvenga neihah Lalduhoma chuan, "Hripui do chungchangah kan sorkar hrawn lai hi a hlawhchham hle. He hri hi sum leh paia do hneh theih a ni lo a, kan zavaia ṭangruala kan do pawhin kan hneh theih loh tehlul nen, keini eptute pawhin kan theih ang angin sorkar puih ve kan tum ṭhin a, mahse, min dawngsawng ṭha duh dêr lo," a ti.

Lalduhoma chuan, "Pathian leh kan ram tan tih thupuia hmangtute party-ah Mizote kan chêp hle a, contract hna thawhah Mizote aiin Kamrula Chhangte chuan hna tam tak a thawk leh si a ni," a ti a; Health Care Scheme-ah sum tam tak sorkarin a bá a, damlote'n harsatna an tawh nasat thu a sawi.

MNF hruai sorkarah sual a ngampa hle tih sawiin Lalduhoma chuan, "Kuhva tawlh rûk leh ruihhlo tawlh rûk a hluar em em a, heng thila inhnamhnawihte leh kan ram hruaitute hian inkungkaihna thûk tak an nei tih mi zawng zawngin kan hria," a ti a; ram leilung fate aiin hnam dangte'n duhsakna an dawng hnem zawk fo tih sawiin, "Kan sorkar hunah chuan heng zawng zawng hi kan ti bo vek dawn. Ram leilung fate hi kan first priority an ni," a ti.

ZPM Leader chuan, Assembly session zawh tâkah ZPM chu 'Vawi khat pawh budget la pharh lo' tia sawi a nih thu sawiin, "AAP party pawh budget la pharh ngai lo an ni a, Delhi an enkawl dan kan en chuan hmasawnna an hmuh nasatzia kan hria a ni," a ti.