Siahaah Lyuva Khutla hman a ni

Mara kût ropui ber, Lyuva Khutla chu nimin khan MADC Complex, Siahaah hman a ni a, MADC chief executive member hlui S Vadyu chu kût pa a ni. Kûtah hian hnam làm leh zai chi hrang hrang entir a ni.

S Vadyu chuan, "Páwn lam miin Mara hnamte min hmuh dan hi The Lakhers NE Perry ziah lehkhabu hrang hrangah hmuh tur a awm a, hnam huaisen, taima, rinawm leh mikhual duat thiam tak, kan pumruate pawh kan chhehvela hnam dangte aia ṭhain min ziak. Chuvangin, kan kût hmante hian kan nihna min hriattir nawn se, kan pi leh pute nun ze mawi leh tih dan ṭha chhawm nung zel turin chona thar min pe mawlh rawh se," a ti.

Siaha bawrhsap Lalsangliana pawhin thu sawiin, Lyuva Khutla chu intihlimna hrang hrang, zai leh làmahte tàwp mai loin, pi leh pute nun ze mawi chhawm nuntirtu ni se a duh thu a sawi.

Mara hnam hian kûtpui pali - Lyuva Khutla, Ladawhdai, Khonakia leh Lang­nechhe te an nei a, heng zingah hian Lyuva Khutla hi an ngaihhlut ber a ni.