Thil ṭha tihnaah insûm loh tur - MPCC President

Mizoram Pradesh Congress Committee (MPCC) chuan nimin khan Congress Bhavan-ah mi thar lawm luh inkhawm an buatsaih a, MPCC president Lalsawta chuan, thil ṭha tihnaah insûm tur a nih loh thu a sawi.

Lalsawta chuan, ram tana thil ṭha tihnaah huaisen a pawimawh tih sawiin, "Thil dik lo leh ṭha lo hmu lo der lo a, infinchhuah a pawimawh. Thil ṭha tihna kawngah insûm tur a ni lo. MNF party hian mi huaisen an nei lo a, an hotupa kal dan ṭha lo nia an hriat pawh 'A dik lo' ti ngam an awm loh avangin tunah hian MNF sorkar leh Mizoram mipui kan buai phah a ni. Party leh sorkara mi an huaisen theih loh chhan chu tlâktlum loh an hlauh vang a ni a, tlaktlum loh hlauh hi ram tan a him lo," a ti.

Assembly session neih zawh tâka an party MLA-te chêt dan mawi a tih thu sawiin Lalsawta chuan, "Thusawi thiam ringawt hi a ni lo a, ram tana thil ṭha tiha change siam a ngai zawk," a ti a, ṭhat loh theih lohna báwm chu an party tan chauh a ni lo a, Mizoram tan a nih thu a sawi.

MPCC treasurer Zodin­tluanga Ralte pawhin thu sawiin, budget session neih zawh tak chu budget awmze nei lo, mipui sum tam tak awmze nei loa hman tumna a nih thu a sawi a, "A thlàwna hun leh thâ sênna mai a ni a, ram tana awmze nei lo budget session a ni. Budget en hian CM-in a minister-te a ring zo thlâwt lo tih chiang takin a lang a, an hna chan pualah hna thawhna tur pakhat mah a dah duh lo," a ti.