MZP-in mi pathum sponsor dawn

MZP hruaitute chuan nimin khan an pisaah thuthar thehdarhtute an kâwm a; All India Service leh civil service-ah Mizote an tlin theih nan Delhi-a coaching kal turin zirlai pathum an sponsor dawn thu an puang.

MZP president Lalnun­mawia Pautu chuan, MZP chu zirlai pawl a nih angin zirlaite chàwi kân chu a ngaih pawimawh ber pakhat a nih thu a sawi a, "Mizo zirlaite tihhmasawnna leh chawi kân hi a vei leh tum ber a ni. Mizoram hian all India service leh central service a tling hi tun hnaiah a nei ta mang lo a, all India service-ah phei chuan kum 10 dawn Mizo ṭhalai tling thar a awm tawh lo," a ti.

Mizo zirlai thluak ṭha leh theihna nei, tumna tak tak nei zawn chhuah a, New Delhi-a coaching ṭha bera kaltir (sponsor) turin hma an lak mek thu sawiin Lalnunmawia chuan, "Tunah hian Vajiram & Ravi Coaching Centre, Delhi chuan MZP tan seat panga min reserve sak tawh. Nimahsela, sum leh pai a hautak dawn avangin mi pathum sponsor turin hma kan la mek a ni," a ti.

MZP President chuan, mi inphalte thawh khawm aṭanga Mizo zirlai pathum an sponsor turte chu an senso engkim an tumsak dawn tih sawiin, "Kum hnih chhung kalpui tura ruahman phawt a ni ang. Sponsor tur thlan kawngah UPSC exam kalphung zulzuiin screening test kalpui a ni dawn," a ti a, personal interview uluk taka neih hnuah a ti ṭha pathum thlan tur a nih thu a sawi.