Covid-19 veite enkawlna hmun a tháwl

Health minister Dr R Lalthangliana hoin nimin khan sorkar hotute'n Secretariat Conference Hall-ah Covid-19 din­hmun an thlirho a; Minister chuan, district tina DCHC, CCC leh CCCC-a dah luh ngai an tlém tawh a, hripui léng vanga state-in harsatna a tawh chu a kiam tawh hle tih a sawi.

Ṭhutkhawmah hian kohhran inkhawm leh inrêlbàwlna chungchanga MKHC-in an duh dan an sawi chu Chief Minister leh State Executive Committee (SEC)-ah thlen ni se, an ti a; zirlaite dan pangngaia zirna kalpui chungchang pawh SEC-ah thlen an rél bawk.

Dr R Lalthangliana chuan, state dangte nena khaikhinin Mizoramah Covid-19 positive zat la tam viau mah se, hmun dang aiin swab sample endik Mizoramah a la tam thu a sawi a, "Khaw ṭhenkhatah phei chuan a khaw mite duhthusam ang takin mass testing pawh kalpui a la ni. Posi­tive zat tam deuh mah se, nunna chán erawh state dangte khaikhinin an tlem hle a ni," a ti.

Ṭhutkhawma tarlan danin, Mizoramah dedi­­cated covid health centre 20 a awm a, damlo enkawl theih zat aṭanga 18% chauh hripui vei enkawl mek an awm. CCC-te chu awm thei zat aṭanga 5% chauh luah khah a ni a; CCCC khum 14,045 awm theihnaah damlo 683 (4.8%) chauh an awm bawk. Mahni in lama inen­kawl mi 2,678 an awm a, chu chu active case zat aṭangin 75% a ni.