Hripui vei enkawl lai 1.38% chiah an awm

March 10, Ningani khan Mizoramah Covid-19 vei mi 396 hmuh chhuah a ni a, positivity rate a tlahniam. Nimin khan mi 530 chhuahtir niin, hripui vanga enkawl lai mi 3,029 (1.38%) chiah an awm tawh. Nimin khan Covid-19 vei mi pakhat a thi.

Covid-19 vei Ningania hmuh tharte chu mipa 184 leh hmeichhia 212 an ni a; RT-PCR laboratory-a hmuh chhuah mi 14, TrueNAT hmanga hmuh 39, RAT hmanga hmuh 336 leh FIA hmanga hmuh mi pasarih niin, positivity rate chu 13.69% a ni.

Ningania Covid-19 positivity rate chu Hnah­thial district-ah 45.31%, mamit district-ah 34.83% leh Serchhip district-ah 30.28% a la nih laiin, Aizawl district-ah chuan 4.79% chauh a ni tawh.

Nimin khan hripui vei dam tawh mi 530 chhuahtir an ni a, district tina chhuak zat chu - Mamitah mi 132, Aizawlah 111, Khawzawlah 78, Saitualah 56, Serchhipah 47, Lungleiah 43, Hnahthialah 22, Champhaiah 15, Kolasib-ah 15, Siahaah 10 leh Lawngtlaiah mi pakhat an ni.

IDSP record angin, Mizoramah Covid-19 vei 2,20,026 hmuh chhuah a ni tawh a, mipa 1,02,719 leh hmeichhia 1,17,307 an ni a, mipa aiin hmeichhia 14,588-in an tam zawk. Nimin tlai dar 5 thleng khan mi 2,16,330 (98.32%) chhuahtir an ni tawh a, mi 667 (0.30%) thi tawhin, enkawl mek mi 3,029 (1.38%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,20,026 chu mi 1,000 zelah hripui vei mi 200 an awm ang a ni a; mi 1,00,000 zela Covid-19 vangin mi 60 an thi tawh ang a ni tih sorkar thuchhuakin a tarlang.

Mizoramah March 9, 2022 thlenga swab sample endik tawh 18,62,709 aṭanga positivity rate chu 11.81% a ni a; RT-PCR hmanga endik zat percentage chu 19.96 a ni a, RAT hmanga endik zat chu 74.38% a tling.