KHAWTHLIR

Thisen pe
Mizoram Law College NSS unit chuan Civil Hospital, Aizawl blood bank-ah thisen unit 17 an pe a, petute mipa 12 leh hmeichhia panga an ni. HBK MMA Gym, Kulikawn pawhin Synod Hospital blood bank-ah nimin khan thisen unit sarih an pe bawk.

Ráltlânte zirtir
Lunglei District Committee on Myanmar Refugees chuan nimin khan DC conference hall-ah Myanmar ráltlânte pualin dan leh hrai inzirtirna 'Legal Awareness Campaign for Myanmar Refugees' an buatsaih a, district bawrhsap Kulothungan A-in a hmanpui. DC chuan, Lunglei district-ah refugee camp pariat awmin, ráltlân 2,007 an awm thu leh Mizoram sorkarin a theih ang angin ráltlânte a ngaihsak thu a sawi.

Chawimawina hlân
Azadi Ka Amrit Mahotsav hmanna kal zelah nimin khan Kolasib DRDA conference hall-ah 'lconic Week International Womens Day' pualin hun hman a ni a; Kolasib-a Rural Development department hnuaia programme scheme-a thawk ṭha hmeichhia 23 hnenah Kolasib DRDA project director R Lalnghakliana'n chawimawina a hlân.

MAL an lawm
Mizo Academy of Letters chuan thuchhuah siamin, Legislative Assembly session neih zawh takah Mizo Language Development Board Bill 2022 pawm a ni chu lawmawm an tih tak zet thu an tarlang a, "Hnam pumpui tan hmasawnna rahbi pawimawh tak, ṭhang leh thar lo la awm zel tur tana ro tling, chhinchhiah tlak, hriat reng tur a ni ngei ang," an ti.

Kum 10 tlin lawm
Lungsen, Lunglei district-a chawlhkar tin chhuak chanchinbu Lungsen Post chuan nimin khan an kum 10 tlin an lawm a, MJA Gen.Hqrs. president Zonunsanga, Lunglei IPRO C Lalremruati leh district MJA hruaitute'n an hman pui. Zonunsanga Khiangte chuan, "Kan hna mipui rawngbawl hi Pathian hian a rawngbawlnaah min pawmsak a ni," a ti. Lungsen Post editor C Lalremruata chuan chanchinbu a buatsaih dante a tarlang.