Kawlphetha man tihpun dan: 2020-21 ah a punna a sang ber

Joint Electricity Regulatory Commission (JERC) for Manipur and Mizoram chuan kawlphetha hman man a ennawn ṭhin a, tun hnai kum sarih chhunga power tariff pung ṭhinah kum 2020-21 ah a punna percentage a sang ber.

Mizoram sorkar chuan kum tinin JERC hnenah kawlphetha hman man ennawn rawtna a thlen a, power tariff rate tur an rawt tel nghal ṭhin. JERC chuan Mizoram sorkarin power tariff tihsan rawtna a thlenin, sawisel duh emaw, rawtna emaw neite tan hun a hawng ṭhin a; chumi hnuah public hearing koin, sawiselna neite'n an duh zawngte an sawi a, Power & Electricity department hotute'n tariff tihpun an rawt chhante an sawifiah ṭhin bawk.

Tun hnai kum sarih chhungin kum tin kawlphetha hman man hi tihsan a ni a, a punna percentage a sàn ber ṭum chu kum 2020-21 kha niin, 26.59%-in tihpun a ni a, a punna percentage a hniam ber ṭum, kum 2015-16 khan 2% chiah a ni thung.

Tarlan tawh angin, Mizoram sorkar chuan kum 2022-23 atan power tariff tihsan rawtna JERC-ah a thlen leh tawh a, political party ṭhenkhat chuan duh loin, sawiselna leh dodalna an thehlut. Kawlphetha hman man tihsan chungchangah hian JERC chuan public hearing a ko tawh.

Mizoram sorkar chuan kum 2022-23 atana power tariff thar a rawt chu kum 2021-22 chhunga tariff aṭangin 21.05%-in a sang zawk. Mizoram sorkarin rawtna a siam anga power tariff tihsan a nih chuan, sorkarin a subsidise hnuah chawhrualin kawlphetha unit khat man Rs 8.80 a ni dawn a, tariff hman mekah chuan unit khat man Rs 6.71 a ni.