Health Care-a CM thusawi a dik lo, MNF sorkar lâk luhnaah Abub a tel - MPCC

Mizoram Pradesh Congress Committee (MPCC) chuan, Mizoram State Health Care Scheme (MSHCS) chungchanga chief minister Zoramthanga thusawi chu thu dik lo a nih thu an puang. Kuhva rah tawlh rûk vanga Assam police-te’n an man Abub Ahmed Majumdar chu December 2018-a MNF sorkar lak luhnaah a tel thu an sawi bawk.

MPCC Media department hotute chuan March 12, Inrinni khan Aizawl Press Club-ah thuthar thehdarhtute an kâwm a; an chairman Dr Lallianchhunga chuan, Health Care Scheme (HCS) hnuaia damlo bill pek theih loh chu Rs. 59,63,40,278 a ni thu sawiin, "Hei hi February 14, 2022 thlenga mi 23,031-te bill sorkarin a bat a ni a, financial year kal mek 2021-22 chhunga damlote bill pek a la ni lo hrim hrim," a ti.

Damlo bill pek theih loh tam tak a awm chhan ber chu MNF sorkarin HCS atan sum a dah tam theih loh vang a nih thu sawiin Lallianchhunga chuan, "An duhsak záwng contractor-te cheng vaibelchhe tam tak man hna an thawhtir theih laia hetianga bill táng a tam hi hriatthiam theih a ni lo a, HCS-ah hian MNF sorkar hi a hlawhchham chiang hle," a ti a; Congress party-in sorkarna an siam leh a nih chuan HCS-a bill bá awm mek chinfel chu an ngaih pawimawh hmasak ber tur zing a mi a nih thu a sawi.

Dr Lallianchhunga chuan, CM Zoramthanga’n March 8, 2022-a Assembly session-ah, HCS chu tlin lo chunga an kalpui thu leh state dang hausa zawkte pawhin an kalpui theih loh an kalpui thu a sawi chu chhangin, "Hei hi thu dik tâwk lo a ni a, Mizoram anga kalphung ṭhain state eng emaw zatin health care an kalpui mek a ni," a ti a; state ṭhenkhata health care scheme kalpui dan a tarlang.

Sorkar kum thar, 2022-23 atana MSHCS-a registration tih tharna tur sum chawi ngai chu sawiselin Lallianchhunga chuan, "Rs 100 chawi ṭhin AAY chhungkuate'n Rs 200 chawi a ngai ta te, Rs 1,000 chawi ṭhinin Rs 2,000 chawi a ngai tate hi mipui rawkna dik tak a ni. HCS bill bá cheng vbc. 59 rulhna tur mipuiin kan thawh khawm dawn a ni ber a, mipuite hi MNF sorkar hian HCS hmangin min sawp a, min rawk mek a ni," a ti.

MPCC Media Chairman chuan zawhna chhángin, "Swearing-in ceremony-ah khan Abub Majumdar a rawn kal, kan MLA-te pawhin an hmu," a ti a; dan loa kuhva rah tawlh rûknaa inhnamhnawih vanga Assam police-in an man tâk Abub Ahmed Majumdar chu December 15, 2018-a Zoramthanga leh a kaihhruai sorkar lâk luhna inkhawmah a tel thu a sawi.

MPCC Media Chairman sawi danin, HCS kalpui ṭan laiin MNF sorkarin HCS sum chu Minister pakhat fate thawhna Bajaj Allianz-a Fortune Plus policy-ah annual premium anga dah a ni a, chuvang chuan HCS chu a nih tur angin a kal thei lo a, damlo bill táng a tam hle ṭhin.

December 2008-a Congress ministry a pian pawhin HCS sum chu hun bithliah neiin Bajaj Allianz-a dah a nih avangin harsatna a awm zui a; Asian Development Bank aṭanga hmuh cheng vbc. 117.80 leh HCS sum hman bâng, a vaiin vbc. 149.6 chu kum 2010-11 aṭangin MSHCS sum báwmpui (Corpus Fund)-ah dah niin, Finance department-in bank pali-ah a pung tam thei ber turin an dah a ni.

MSHCS sum Corpus Fund-a dah pung hmangin damlo bill pek ṭhin a ni tih sawiin Lallianchhunga chuan, "Congress sorkar lai khan tun anga harsatna lian tham a awm ngai lo; kum 2011, 2013 chho velah chuan MSHCS corpus fund sum pung khan bill a daih vek ṭhin," a ti a; December 2018-a MNF sorkar a pian laiin HCS corpus fund-ah cheng vbc. 155 chuang a awm thu a sawi.

Dr Lallianchhunga chuan, ZIDCO hnuaia Mizoram tana buhfai supply-tu mi pariat zingah Abub Ahmed Majumdar a tel ve chu a mak tih loh rual a ni lo tih sawiin, "MNF sorkar hotu lian zingah hmelhriat ṭha tak a nei ngei tih nemnghettuah kan ngai," a ti a; Mizoram sorkara buhfai supply-tu man a ni chu Mizoram tan pawh a mualphothlâk thu a sawi.

Mizoram sorkarin duhsak taka Abub Majumdar-a buhfai a supply tir chu pawi an tih thu sawiin Lallianchhunga chuan, "Hei hian Mizoram sorkarin insawi fihlim tuma Abub Ahmed Majumdar chungchang thuchhuah a lo siam tawhte pawh a ti rinhlelhawm vekah kan ngai. Abub Majumdar hi buhfai a la supply tir zel dawn em tih Mizoram sorkar kan zawt nghal a ni," a ti.

MPCC Media hruaitute chuan, Lengpui Airport chei ṭhat mek chim chungchanga sorkar sawifiahna chu a dik tâwk loa an ngaih thu an sawi a, "Iron rod an hmang tlem, a tê bawk. Rora, balu leh cement inchawhpawlh a fuh lo a, engineer-te tih dan anga tih a nih kan ring lo," an ti a; tun hnaia chim ta bakah, hmun dang, terminal chhung leh páwn lam siam mekte pawh ennawn ni se an duh thu an sawi. Contractor Kamrul-a chu Zirtawpni (March 11, 2022) khan an hmuh thu leh a zin chhuah mang loh thu an sawi bawk.