Airport chei ṭhat meka hna thawhte a ṭha tawk loah mistiri-te'n an ngai

Mizoram Mistiri Association (MMA) chuan March 12, Inrinni khan thuchhuah siamin, Lengpui Airport chei ṭhat meka hna thawhte chu a ṭha tawk loa an ngaih thu an puang.

MMA chuan, Lengpui Airport chei ṭhat lai chim ta chu a hmunah an enfiah thu an tarlang a, "He hna thawh danah hian mistiri chu thawktu pawimawh tak ni mah se, contractor emaw, supervisor emawin mawh an phur hlein kan hria. Rod zawm dan leh cement proportion a dik tâwk lo a, tui a mamawh ang an pe loin kan hria a, chu chuan concrete chakna tam tak a tichhia a ni," an ti a; a ban leh beam, slab tlo dan tur angin a tlo dawn lo tih a chianga an hriat thu an sawi.

Airport terminal building kawta kawng chhâwng tur siam mek pawh a rel (structure) a dik tâwk loa an hriat thu sawiin MMA chuan, "Mizorama construction hna thawh reng rengah contractor emaw, hna viltu supervisor emawte'n hlêp nasat tumna avanga hmanraw hman chhiat leh hna uluk lo tak mistiri hna an thawhtir ṭhin hi pawi kan ti a, hetiang hi thleng tawh lo se kan ti," an ti a; mistiri-te hnathawhna ṭheuhah sahimna ngai pawimawh turin an ngen bawk.