Ramhnuaia hna thawhnaah sikserh vei an tam

Aizawl District Task Force on Malaria Elimination (DTFME) chu an chairman Dr Lalhriatzuali Ralte, district bawrhsap hoin March 11, Zirtawpni khan Vaivakawn Branch YMA Conference Centre-ah an ṭhukhawm. Construction worker zingah leh ram palailénga hna thawhna hmunah sikserh vei an tam chhoh thu an tarlang.

Dr Lalhriatzuali Ralte chuan, sorkar department hrang hrang, kohhran leh tlawmngai pawlte chu kum 2030 hmaa Aizawl district-a sikserh leh vector-borne disease tihrêm vek a nih theih nan ṭanrualpuiah a sáwm a ni.

Ṭhutkhawmah hian construction worker leh ram palailénga hna thawhna hmunah sikserh vei an tam chhoh mek thu tarlan niin, "Hna thawktu sorkar department leh private contractor-te hnenah sikserh laka an hnathawkte himna tura zirtir te, hmalakpui tura ngen leh hriattirna pek ni se," an ti a; Central YMA chu an chanchinbu bakah, branch tin YMA chanchinbuah zirtirna kalpui ni se an duh thu an sawi.

Tarlan danin, Health department hnuaia Aizawl East leh Aizawl West district-te chu category-1 (elimination phase)-ah an awm thu tarlan a ni. Kohhran hrang hrangte chu sikserh ûm bona lam zirtirnate kohhranah zirtir leh sunday school zirlaiah pawh dah tel dan zawng tura ngen an ni a; Fisheries department chu thosi notê (larvae) ei thei tur omnivorous fish enchhin nan common carp leh sangha chi dangte sangha dil ṭhenkhata dah chhin tura ngen ni se, an ti.

School Education department kaltlangin sikul naupangte hnenah uar zawka zirtirna kalpui te, ni 100 inhlawhna (MGNREGS) kaltlangin thosi pianna hmun titlem a nih theih nan hma la tura ngen te, anganwadi centre tinah naupang hriatthiam theih tur pamphlet/card/poster siam leh naupangte zirtir uarte an rél bawk.

Ṭhutkhawma tarlan ṭhenkhat
1) Rama riak ṭhinte chu Health sub-centre-ah thosilên chiahsak theih reng a ni.
2) Aizawlah Dengue natna vei an awm chho zel.
3) Dengue vei an tlakhniam theih nan AMC hnuaia LC leh NGO-te'n thosi tamna hmunah fogging tih a ṭul.
4) Fogging ti duh tan diesel intum chawpin SCVBDC State Rapid Response Team koh theih reng an ni.