State-in hma a sawnna atan ei turah intodelh a ngai - CM

Zoramthanga chuan, hnam nunzia leh tihphungte chu a ṭhang a, a insiam danglam zel tih sawiin, "Chu chuan kan hnam thuam, ṭawng, thu leh hla, khawtlang nunphung, ei leh inte a keng tel a ni," a ti a; hnam puitling apiang culture a hausak thu a sawi.

Puantah leh thiamhnâng aṭanga thil siam chhuah (handloom & handicraft) mawi leh ṭha tak takte pho chhuak a, a zawrhna hmun ṭha tak tak hawn thar leh a ni chu lawmawm a tih thu sawiin Zoramthanga chuan, "Hnam humhalh kawngah kan puantah leh thiamhnáng dehtute kutchhuak hi chawi lâr thiam a pawimawh," a ti.

Chief Minister chuan, ni tin nunah hnam ziaráng tilang theitu behtir tlat a pawimawh thu sawiin, "Hnam dang pawhin an rawn hmuh theiha kan chawi lâr thiam a pawimawh. Langsâr ber tura ka duh chu, remna leh muanna, remna siamtu nihna hi ni se," a ti a; remna leh muanna chu Mizo hnam nihnaa bet tlat, mi dang pawhin an entawn theih tur langsar tak ni zel tura a duh thu a sawi.

Sales Emporium hawnnaah hian minister of state K Lalrinliana, MLA pathum - Ramthanmawia, Zothantluanga leh K Laldawngliana, Aizawl mayor Lalrinenga Sailo te pawh an tel.

ZOHANDCO hi kum 2019 khan din thar leh niin, chairman chu C Lalrammawia a ni a, Board of Directors-ah mi pakua an awm a, office-ah thawktu 19 an awm mek a ni.