Thlám kângah mi 3 an kâng hlum

Nimin zing dar 3 vel khan East Phaileng leh Suang­puilawn inkara Rungdil kam, Saitual district-a Lalmuankima (51), Ramhlun South thlám a kâng a, mi pathum an kâng hlum.

Saitual Police Station aṭanga thu dawn danin, Lalmuankima thlám hi a chhâwng a ni a, a chhâwng chungah Lalmuankima bakah a fapa leh a tupa an riak a, a chhâwng hnuaiah hna thawka an chhawr Vanlalmawia (58) leh a fanu Lalrinmawii (13), East Phaileng khuate an riak thung.

Lalmuankima fapa David (14) leh a tupa Isaaka (28)-te chuan thâwm an hria a, a hnu lawkah kângmei a chhuak zui a; thláma riak ve mi dangte chu au mah se, an tho thei lo a, Lalmuankima bakah, in hnuaia riak Vanlalmawia leh a fanu Zorinmawii te chu an kâng hlum ta a ni. Thlám páwna an motor (Bolero) dah pawh a kâng chhe vek bawk.

Thu dawn danin, David leh Isaaka te chu kawngkapui lamah chhuah an tum a, mei alh a nasat tawh avangin tukverh aṭangin an chhuak a; an chhuah hma hian pindan hrana riak Lalmuankima chu an au ṭhin a, an au harh zo lo a ni.

Kângmei chhuah chhan hriat ni lo mah se, thlám hnuai zawk thukah mei chhêm a ni a, chuta ṭang chuan kângmei a chhuak a nih rin a nih thu Saitual police-te chuan an sawi.

Chhiatna thlenna hmun hi nimin khan Saitual police-te'n an pan nghal a, mitthi ruangte chu postmortem turin Saitualah an la a, postmortem zawhah an chenna hmun panpui a ni.