KHAWTHLIR

Thisen pe
March 12, Inrinni khan KṬP, Khatla North Branch chuan an kohhran hall-ah thisen pek an huaihawt a, Synod Hospital tan mipa 31 leh hmeichhia pangate'n thisen unit 36 an pe. ṬKP, Nazareth unit, Lawngtlai pawhin Lawngtlai District Hospital tan thisen unit 30 an pe a, petute mipa 22 leh hmeichhia pariat an ni.

Bill pass-ah lawm
Mizo Poetry Society chuan thuchhuah siamin, Mizoram Legislative Assembly session-in March 10, 2022-a Mizo Language Development Board Bill, 2022 a pawm ta chu lawmawm an tih thu leh Bill a puitlin theihna tura thawktu zawng zawng chungah an lawm thu an tarlang a, "He Bill hi a taka kalpui a nih hunah chuan Mizo ṭawng humhalhna atan te, Mizo ṭawng hmasawnna leh vawrh làrna atante a ṭangkai hle dawn a ni," an ti.

Lehkhabu tlangzarh
H Lalzirliana, MLA chuan March 12, Inrinni khan a pisaah ZoCareer Solutions director RK Hnuna ziah 'Mizo Competitive Year Review' tih lehkhabu a tlangzarh.

Pawngsual dem
Armed Veng South local council leh NGO-te chuan thuchhuah siamin, ni 28.2.2022-a Suresh Chandra Meena, Kendriya Vidyalaya Primary School-a thawkin an veng nula a pawngsual nia tarlangin, "Pawi kan tiin kan dem hle. A phutawk hremna pek a, bail-a chhuahtir loh nise kan duh," an ti.

Kawng khâr dawn
PWD chuan vawiin aṭangin Ramthar North (Electric Veng thlanmual péng) kawngpui râwt hniam hna an thawk dawn a, hei vang hian kawng khàr a ni dawn. Traffic SP Rodingliana Chawngthu chuan, Ramthar North leh Chite lam aṭanga kal turte chu Ramthar Galilli Veng lamah kalin, Theihai lui thlen hma Sihpui panna kawngah emaw, Theihai lui paltlang pheiin Armed Veng lamah emaw kal theih a nih thu a tarlang. Hnathawh tibuai theia lirthei leh bungrua dah phal a ni lo tih a tarlang bawk.