Swab sample endik leh positive zat tlahniam zel

Ni hnih, March 11-12, 2022 chhungin Mizoramah Covid-19 vei mi 760 hmuh chhuah a ni. Swab sample endik zat leh hripui vei hmuh zat a tlakhniam tial tial laiin, positivity rate erawh a la sang hle. Inrinni leh nimin khan hripui vei dam tawh mi 753 chhuahtir an ni a, Covid-19 vei mi pahnih an thi.

Covid-19 vei March 11-a hmuh chhuah mi 403-te chu mipa 189 leh hmeichhia 214 an ni a; RT-PCR hmanga hmuh pasarih, TrueNAT hmanga hmuh 38 leh RAT hmanga hmuh 358 niin, positivity rate chu 20.12% a ni.

March 12, Inrinnia hmuh chhuah thar mi 357-te chu mipa 143 leh hmeichhia 214 an ni a; RT-PCR hmanga hmuh 16, TrueNAT hmanga hmuh 23, RAT hmanga hmuh 311 leh FIA hmanga hmuh pasarih niin, positivity rate 22.05% a tling.

Nimin khan hripui vei dam tawh mi 319 chhuahtir an ni a, Inrinni khan mi 434 chhuahtir an ni bawk.

IDSP record angin, Mizoramah Covid-19 vei 2,20,786 hmuh chhuah a ni tawh a, mipa 1,03,051 leh hmeichhia 1,17,735 an ni a, mipa aiin hmeichhia 14,684-in an tam zawk. Nimin tlai dar 5 thleng khan mi 2,17,083 (98.32%) chhuahtir an ni tawh a, mi 671 (0.30%) thi tawhin, enkawl mek mi 3,032 (1.38%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,20,786 chu mi 1,000 zelah hripui vei mi 201 an awm ang a ni a; mi 1,00,000 zela Covid-19 vangin mi 61 an thi tawh ang a ni tih sorkar thuchhuakin a tarlang.