ZPM chuan contract leh sorkar hna lakah duhsak bik kan nei dawn lo - K Sapdanga

Aizawl East-I biala ZPM mi leh sate chu Inrinni khan khawlai tifaiin an hnatlang. Hnatlanga thawk chhuakte chu Zemabawka ZPM pisa bulah intâwk khawmin, inkhawm tâwi buatsaih a ni a, ZPM candidate K Sapdanga chuan thu sawiin, sorkarna an siam chuan contract leh sorkar hnaah duhsak bik an neih dawn loh thu a sawi.

K Sapdanga chuan, tun aṭanga ni 10 hnuah ram tana lal tur ni lo, ram tana rawngbawltu tur thlan a ni dawn tih sawiin, "Tun hmain lal tur in lo thlang ṭhin a ni mai thei, tun ṭumah chuan Aizawl East-I mipuite hian in chhiahhlawh tur in thlang dawn a ni," a ti.

ZPM mi leh sate chu MLA leh minister bathlara eizawn tum lo tura chahin K Sapdanga chuan, "Contract leh sorkar hnaah duhsak bik neih kan tum lo," a ti a, sawhthing pawh a thar tam apianga an leisak mai tur thu a sawi.

Thlan tlin a nih chuan a bial chhung veng leh khaw tinah Development Committee din a nih dawn thu sawiin Sapdanga chuan, "Committee-te hian an khua/veng tana pawimawh leh ṭulte ngaihtuahin an ṭhukhawm ang. MLA fund hi cheng khat pawh MLA kutah a awm lo ang a, Development Commolittee kutah a awm dawn a ni," a ti.

K Sapdanga chuan, Aizawl East-I bial chhung kawng zawng zawng a zawh chhuah tawh thu sawiin, "Hmalak nghalna tur leh ngaih pawimawh ṭulte ka hre chiang tawh hle," a ti a, thlan tlin a nih veleh hna thawh ṭan nghal a nih tur thu sawi.

An party zawm tharte fuihna thu sawiin K Sapdanga chuan, "Mihring hi ngaihdan inthlak thleng thei kan ni. Kan chhuahsan pawlte diriama sawichhe lo turin ka duh che u. ZPM an zawm thu puan chhuah kher duh lo, min ṭantu eng emaw zat an awm a ni," a ti.

Inkhawm hi Zemabawk MPF hruaitu Upa Rothanga'n a kaihruai a, ZPM star campaigner Vanneihtluanga leh PL Liandinga te pawhin thu an sawi a; PL Liandinga chuan, K Sapdanga chu a mi hriat chian a nih thu leh MLA a nih avanga a sum hmuh turte bial mipuite tana hmang duh tur a nih thu sawiin, "Ama sum pawh a chawi belh hial duh ang," a ti a, Aizawl East-I mipuite chu K Sapdanga vote turin an sâwm a ni.