Hearing awm loin Bru mi 204-te Lunglei dist. electoral roll-ah thun

Tripura relief camp-a awm Bru mi 204 chu hearing mumal awm loin Lunglei district aṭangin Mizoram electoral roll-ah thun a ni tih hmuh chhuah a ni a; hei vang hian vawiin hian Lunglei NGO Coordination Committee chuan Lunglei Bawrhsap, District Election Officer ni bawk pisa tualah lungawi lohna an lantir dawn.

Lunglei NGO Coordination Com-mittee thuchhuah tarlan danin, Bru mi 204, Lunglei district chhunga electoral roll-a thunte chu Election department-in an tirhte'n Tripura-a Bru camp-ah kal chilhin electoral roll-ah an thun a; tih dan phung pangngai ang ni loin, hearing nei loin Lunglei district-a Assembly bial hrang hrang hrang electoral roll-ah an thun tih hmuh chhuah a ni.

Lungleia Joint NGO chuan, hearing pawh awm loa Bru mi 204-te electoral roll-a thun an ni chu pawi an ti hle tih sawiin, a tàwp thlenga dodal an tum thu an puang. Hmalakna hmasa atan vawiin hian chawhma dar 10-ah Lunglei Bawrhsap pisa tualah lungawi lohna an lantir dawn a, electoral roll chhut chhuah thar, Second Supplementary Electoral Rolls tia hriat chu an hâl dawn a ni.