MTA-in CM Hawla leh a hote an dem

Mizoram Tipper Association (MTA) chuan an general secretary Zoremsanga Sailo hmingin thuchhuah an siam a; chief minister Lal Thanhawla leh a hote Aizawl aṭanga Serchhip lama zin turin Hualngohmun bulah tipper pakhat chunga an thil tih dan chu an dem thu tarlangin, sorkar hotute'n driver-te chunga hleilenna sim tawh se an duh thu an sawi.

MTA tarlan danin, November 16, 2018 khan Aizawl-Lunglei World Bank road, Hualngohmun pêng bul chiahah taxi MZ-01 L-4865 leh tipper MZ-01 L-6962 te chu intâwk lawi deuh a, chutih lai chuan an hnung lama tlan CM Lal Thanhawla te Serchhip lama kalte motor chu anmahni leh anmahni an intipalh a ni. Chu an intihpalhnaah chuan an intipalh tih pawh hre lo tipper driver leh taxi driver-te chu mawhphurtua puhin, police-te an ûm zuitir a, police station-ah an hruai a ni.

MTA chuan, driver pahnihte an mawhphurhna ni miah loah sorkara hotu zawkte'n police station-a hruaia thubuai siamsak hial an tum chu ná an tih thu sawiin, "MTA Driver's & Owner's, Mizoram Truck Driver Association leh Ashok Leyland Welfare-te chuan thuneihna hmanga kan sorkar thuneitu lamin driver-te laka hleilenna awm ṭhin hi kan dem tak zet. Driver-te an nawm an mâka kutthak hnawih nana min hmanga thuneihna min chelek khumtute hi kan dem tak zet a, driver-te chungah thleng tawh lo se kan duh hle a ni," an ti.