Mamit district kawng siam muang an ti

Mamit District Ṭhalai Pawl (MDṬP) hruaitute chuan November 17, Inrinni khan National Highway 44A, Lengpui-Kanhmun-Tripura double lane-a laih hna thawh mek a hmuna kalin an enfiah a; kawng siam hna thawktu Gayatri company an inthlahdah hlea an ngaih thu an tarlang.

Kawngpui siam hna chu rei tak thawh ni tawh mah se, tun thlenga zawh a la ni loh chu mak an tih thu sawiin MDṬP chuan, "Kawng laih leh siam hna thawktu Gayatri company-te inthlahdah vang leh Mamit district mipui min ngaihsak tâwk loh vang a ni," an ti.

MDṬP chuan, kum 2019 working season chhungin kawng laih leh blacktop hna thawk zo vek turin Gayatri company hotute an ngen a; Gayatri thuneitute pawhin December 2019 ral hma ngeia thawh zawh an intiam bakah, Mamit-Dapchhuak inkar pawh kumin chhung ngeia inkal pawh theiha laih tlang an intiam a ni.

Lengpui-Tripura NH-44A double lane-a laih hna hi Gayatri company-in March 17, 2011-ah an thawk ṭan a, kawng siamna atana estimate amount pumpui chu cheng vbc. 544.75 niin, tun dihmunah revised estimate vawi khat neih a ni tawh.

MDṬP hruaitute chuan, Dapchhuah leh Bawngva inkar, NH-44A Double lane-a la laih loh, kawng awm sate chu kum 2019 fûrpui thlen hma ngeia siam ṭha turin Mamita PWD Highway Division-1 hotute an ngen bawk.