Congress leh MNF bâk dem tur an awm lo - Lalhmangaiha Sailo

ZPM leader Lalhmangaiha Sailo, Aizawl West-II biala ZPM candidate chuan, khawvela economy ṭhang chak ber berte chu kawlphetha hnianghnârna ram an ni tih sawiin, "Ttuna Mizoram dinhmun thlirin, hetiang dinhmun hi kan la hlat hle. Dem tur an awm chuan Congress leh MNF bak dem tur an awm lo," a ti.

Lalhmangaiha Sailo hian Inrinni tlai khan Vaivakawn Bazarah MPF kaihhruaia ZPM Vaivakawn Local Steering Committee-in street campaign an buatsaihah thu sawiin, "Mizoram hi India ram state zingah kan la hnufual hle a, infrastructure leh kawlphetha lama kan intodelh loh vang a ni," tiin, ZPM a sorkar chuan kawlphethaah kum nga chhunga intodelh hman an tum thu a sawi.

ZPM Leader chuan, Aizawl Deve-lopment Authority-in Master Plan for Aizawl: Vision 2030 an siam chu tun thlengin bawhzui a ni lo tih sawiin, "ZPM a sorkar a, he biala thlan tlin ka nih chuan he Master Plan hi a rang thei ang berin kan tipuitling dawn a ni," a ti.

Aizawl North-II biala ZPM candidate Dr Vanlalthlana pawhin Inrinni khan Lalbiakliana Filling Station bula ZPM office hawnnaah thu sawiin, "Kum 30 chuang Congress leh MNF-te'n min hruai tawh a, duhkhawp lohna a na hle. Sorkar din turin ZPM-ten hma lain theihtawp kan chhuah a, Pathian malsawm zawng tak niin kan hria a, bial chhung mipuite'n min duhsaknaah kan lawm em em a ni," a ti. MLA-a thlan a nih chuan MLA fund hman dan langtlang takin website-ah an tarlang zel tur thu a sawi.